Александр Атласов: Бүгүҥҥү уустук кэмҥэ хаһаайыстыбалаах, сүөһүлээх-астаах ыал бигэ туруктаах уонна кэскиллээх

Алтынньы 18 күнүгэр Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Александр Атласов Нам улууһугар тыа хаһаайыстыбатын үлэһиттэрин күнүгэр анаммыт тэрээһиннэргэ кыттыыны ылла.

Бу күн тыа хаһаайыстыбатын салаатыгар эҥкилэ суох үлэлии сылдьар үлэ дьонугар, дьиэ кэргэнинэн утумнаахтык үлэлиир үлэ династияларыгар, бу салааны сайыннарыыга бэриниилээхтик үлэлээбит бэтэрээннэргэ эҕэрдэ тыллары эттилэр уонна Бочуоттаах Грамоталары, Махтал суруктары, түөскэ иилиллэр Бочуот Бэлиэлэри туттардылар.

Норуот дьокутаата Александр Атласов Саха Өрөспүүбүлүкэтин Судаарыстыбаннай Мунньаҕын (Ил Түмэн) аатыттан эҕэрдэ тыллары эттэ уонна наҕараадалары туттарда. Кини тыа хаһаайыстыбатын салаатын үбүлээһин кэнники сылларга ботуччу үрдээбитин санатта уонна анал программалар чэрчилэринэн сүөһү ахсаанын элбэтиигэ, кэтэх, бааһынай хаһаайыстыбалар укулааттарын бөҕөргөтүүгэ туһуламмыт араас хайысхалаах үлэ-хамнас сөптөөхтүк ыытыллар диэн бэлиэтээтэ.

Александр Атласов бүгүҥҥү уустук кэмҥэ бэйэ хаһаайыстыбалаах, сүөһүлээх-астаах ыал, нэһилиэк, улуус бигэ туруктаах уонна кэскиллээх буолбутун тоһоҕолоон бэлиэтээтэ. Кини тас дойдулар санкциялара күүһүрбүт кэмигэр бэйэ аһын-таҥаһын оҥорон таһаарыыны улаатыннарыы, элбэтии дойду үрдүнэн улахан сыал-сорук быһыытынан турбутун санатта.

«Оттон биһиги өрөспүүбүлүкэбитигэр тыа хаһаайыстыбатын, төрүт дьарыгы сайыннарыы – өбүгэлэрбититтэн тиийэн кэлбит норуот олоҕун сүрүн укулаата уонна оҥкула да буоларынан улахан болҕомто ууруллан, Ил Дархан да, парламент да өттүттэн күүстээх өйөбүлү ылан кэнники сылларга бүддьүөттэн өйөбүл ханнык да сыллардааҕар улаатта», – диэн Александр Атласов бэлиэтээтэ.

Тыа хаһаайыстыбатын бородууксуйатын оҥоруу тэтимин үрдэтии, экологическай өттүнэн ыраас төрүт аһы сөргүтүү, дьон доруобуйатын бөҕөргөтөр, ыарыылартан харыстыыр олохтоох аһынан-үөлүнэн хааччыйыы, эдэр көлүөнэ дьоннору тыа сиригэр чугаһатыы, олохсутуу, оҕону кыратыттан тыа сирин үлэтигэр сыһыарыы  –  саха норуотугар тыҥаан турар сүрүн сорукпут уонна сыалбыт буолар диэн кини этиитин түмүктээтэ.

***

Ил Түмэн пресс-сулууспата