Василий Сергеев Россия кубогар 3 миэстэни ситистэ

Саха сирин бөҕөһө Василий Сергеев Россия кубогар булкаас күөн көрсүүһүүгэ 3 миэстэни ситистэ.

Алтынньы 17-20 күннэригэр Москуба куоракка Россия кубогар булкаас күөн көрсүүһүү(смешанное боевое единоборство ММА) күрэҕэбуолан ааста. Онно Саха сирин бөҕөһө Василий Сергеев 3 миэстэни ситистэ. Бу күрэх туһунан кини санаатын үллэһиннэ.

«Мин Чурапчы улууһун Мырыла нэһилиэгэр 1999 сыллаахха күн сирин көрбүтүм, онно оскуолабын бүтэрбитим. Билигин М.К. Аммосов аатынан Хотугулуу-Илиҥҥи федеральнай университетка, физичэскэй култуура уонна успуорт институтун 4 кууруһун устудьуонабын.

Единоборствоннан 2018 сылтан дьарыктанан саҕалаабытым. Оскуоланы бүтэрэн бараммын, колледжка үөрэнэр сылларбар бу көрүҥҥэ секция баар этэ, онно тренердарбыт Юрий Семенович Дмитриев уонна Валерий Максимович Герасимов салалталарынан дьарыгым саҕаламмыта. Дьэ, онтон 2019 сылтан күүскэ, сыаллаах-соруктаах“УраанХай” клубка киирэммин, дьарыкпын салҕаабытым.

Күрэх туһунан:

Бу күрэхтэһиини «Кубок России» Союз ММА России федерацията хас сылын ахсын ыытар. Манна дойдубут хас биирдии муннугуттан сүүмэрдээһини ааһан бөҕөстөр кытталлар. Ол курдук, мин бу күрэх иннинэ, балаҕан ыйын 27-30 күннэригэр Тульскай уобалаһын Новомосковск куоракка бүтүн Арассыыйатааҕы турнирга Р.П. Стащенко бирииһигэр ыытыллыбыт булкаас күөн көрсүһүүгэ бастааммын путевка ылбытым. Күрэхтэһиигэ мин сыл курдук киирсибэккэ, эчэйии кэнниттэн тахсарбар тургутуу күрэх этэ.

Күрэхтэһии таһымын мин үрдүктүк сыаналыыбын. Бэйэм кыттыыбын 10 баалынан ааҕар буоллахха, 8 диэм этэ. Күрэххэ олох үчүгэй бэлэмнээх тиийбитим, ол эрэн кыра эчэйиилэр син биир баар буолаллар маннык көрүҥҥэ. Бэйэм санаабар, кыратык ыксаан хааламмын, сабырыйтардым дии санаатым, инникитигэр өссө күүскэ үлэлэhиэм.

Бастакы киирсиим иккис эргиириттэн саҕаламмыта, Севастопольтан сылдьар Кудинов Денис диэн бөҕөһү кытта. Онтон полуфиналга Чечняттан сылдьар Юсупов Шейхмансуру кытта.

Хас биирдии спортсмен син биир долгуйар дии саныыбын. Долгуйуу миэхэ киирсии иннинэ куруутун баар, ол эрэн, урукку курдук күүстээх долгуйуу билигин суох. Хас биирдии курэхтэһиигэ наар бастыырдыы оҥостон тиийэбин. Бу күрэххэ бастыыр баҕа санаам хаһааҥҥытааҕар да улахан этэ, бэйэм сыыһа туттан, хотторуу хомолтотун билэн олоробун. Ол эрэн, 3 миэстэ буолбуппар мин махтанабын, бу барыта уопут буоллаҕа.

Бу күөн көрсүһүүгэ алтынньы 1 күнүттэн бэлэмнэнэн саҕалаабытым. Бу соторутааҕыта эрэ күрэхтэһииттэн кэлбит буоламмын, этим сииним бэйэтин форматыгар сылдьара, ол иһин дьарыкпыт аргыый аа-дьуо биирдии, ардыгар иккилии күүстээх дьарыгынан барбыта. Күрэх буолара 10күн хаалбытыгар, нагрузкабыт кыччаабыта.

России кубогар иккис кыттыым буолар, былырыын бастакы киирсиибэр хотторуу хомолтотун билбитим. Ол кэнниттэн, кыһыйан, үлэ бөҕөтө баран, быйыл син миэстэ иһигэр киирдибит. Аныгыскыга бастыыр иһин өссө күүстээх үлэ барыа диэн эрэннэрэбин.

Мин сүрүн тренерым Игорь Васильевич Попов буолар, норуокка Тургун Попов диэн аатынан биллэр. Бу күрэхтэһиигэ барарбар, бэлэмнэнэрбэр кини үлэ бөҕөтүн оҥорбута. Онтон ударнай техникабын дьарыктыыр Никита Романович Романов буолар, кини билигин өрөспүүбүлүкэтээҕи лиссиэй-интэринээккэ физкультура учууталынан үлэлиир. Түгэни туһанан, тренердарбар улахан махталбын тириэрдэбин, ону таһынан, харчынан көмө буолбут дьоммор “хоз-маркет” салайааччытыгар Максим Владиморович Феоктистовка уонна биир дойдулаахпар “ИП” Виктор Семенович Петровка махталым муҥура суох.

Бу күрэх уопут бөҕөтүн биэрдэ. Биһиги да киирсиэхпитин сөп эбит диэн эрэл киирдэ. Салгыы аныгыс сезоҥҥа бэлэмнэнэбит, саҥа дьыл кэнниттэн элбэх күрэхтэһиилэр күүтэллэр.

Саха сиригэр даҕаны ММА баар диэн бигэргэтиэхпитин баҕарабыт, ол туһугар Саха сирин Союз ММА федерацията, чуолаан, Ураанхай, Сахаврестлинг, Триумф ММА, Сила Севера, Айхал, Панчер, Сборт База, улуустар уонна да атын спорт клубтар үлэ бөҕөтүн оҥоро сылдьаллар».

***

Татьяна ЖАНЧИКОВА