Арассыыйатааҕы көҥүл тустууга кыайбыт бөҕөстөр ортолоругар 1 мөлүйүөн оонньонуоҕа

Сэтинньи 2 күнүгэр «Өрөгөй» успуорт уораҕайыгар көҥүл тустууга Арассыыйа успуордун маастара, Ил Түмэн норуодунай дьокутаата Александр Крылов кэриэһигэр көҥүл тустууга Арассыыйатааҕы турнир саҕаланна.

Турнирга уопсайа 18 хамаандаттан 155 тустуук кыттар. Ол курдук, Бурятияттан, Тываттан, Владивостоктан, Иркутскайтан, Кемеровоттан, Красноярскайтан, Новосибирскайтан, Хабаровскайтан уонна Монголияттан бөҕөстөр кэллилэр. Саха сирин сүүмэрдэммит хамаандатыттан 98 спортсмен кыттар.

Турнир аһыллыытыгар Саха сирин физическэй култуураҕа уонна успуорка миниистирэ Леонид Спиридонов көҥүл тустууга Арассыыйа успуордун маастарын нуорматын толорбут Александр Авеловка, Петр Адамовка, Владимир Бояновскайга, Николай Заболоцкайга, Игорь Матвеевка, Николай Охлопковка уонна Иван Охлопковка бэлиэлэрин  туттарда.

Ол курдук, финалга киирдилэр:

57 киилэҕэ:

Федор Постников (Саха) – Аяндай Ондар (Тыва)

61 киилэҕэ:

Коркин-2024 турнир кыайыылааҕа Александр Авелов (Саха) – Кежик Монгуш (Тыва)

65 киилэҕэ:

Василий Григорьев (Саха) – Кежик Чымба (Красноярск)

70 киилэҕэ:

Айсен Потапов (Саха) – Сайын Казырык (Тыва)

74 киилэҕэ:

Константин Капрынов (Саха) – Александр Балтуев (Бурятия)

79 киилэҕэ:

Бырааттыы Сучковтар: Никита Сучков – Антон Сучков (Красноярск)

86 киилэҕэ:

Азрет Улимбашев (Красноярск) – Дмитрий Зайнидинов (Красноярск)

92 киилэҕэ:

Буянто Шадапов (Бурятия) – Эмиль Рамазанов (Хабаровск)

97 киилэҕэ:

Даниил Иванов (РСО) – Константин Пшеничников (Кемерово)

125 киилэҕэ:

Никита Хабаров (Саха) – Харысхан Баппагай (РСО)

Кыайыылаахтар – 70 тыһыынча, иккис – 50 тыһыынча, үһүс – 30 тыһыынча солкуобай наҕараадаланыахтара. Чөмпүйүөннэр тириэньэрдэригэр – 20 тыһыынча солкуобайы туттарыахтара.

Турнир кыайыылаахтарын иһигэр 1 мөлүйүөн солкуобай уу харчынан бириис оонньонуоҕа. Бу иннинээҕи сылларга 1 мөлүйүөнү 2022 сыллаахха Красноярскайтан Дмитрий Зайнидинов, 2023 сыллаахха Бурятияттан Тумэн Бодиев ылбыттара. Быйыл дьэ ким ылара буолуой? Финалга интэриэһинэй киирсиилэри күүтэбит.

Финал сарсын сэтинньи 3 күнүгэр «Өрөгөй» успуорт уораҕайыгар буолар. Күнүс 12 чаастан утешительнай көрсүһүүлэр, онтон финал 16 чаастан саҕаланыаҕа. Көрөөччүлэргэ киирии – босхо.

***

Татьяна ЖАНЧИКОВА