Сииттэҕэ Сомоҕолоһуу күнүгэр «Олоҥхо — дойдутун оҕотобун» тэрээһин буолла
Сомоҕолоһуу күнүгэр, Сииттэбит нэһилиэгэр, Россияҕа Дьиэ кэргэн, Саха республикатыгар Оҕо, Кэбээйибит улууһугар Нэһилиэстибэ сылларыгар аналлаах «Олоҥхо — дойдутун оҕотобун» диэн олохтоох култуура дьиэтин үлэһиттэрин көҕүлээһиннэринэн, уол оҕо талаанын, дьоҕурун толору арыйарыгар күүс — көмө, тирэх буолар инниттэн үлэ ыытыллар. Бу үчүгэйи, кэрэни, эрэли эрэ саҕара саарбаҕа суох.
Бары билэрбит курдук 2026 сылга Кэбээйибит улууһугар Олоҥхо ыһыаҕа буолаары бэлэмнэнии үлэлэрэ, мунньахтара номнуо ыытыллан эрэллэр. Бүгүҥҥү улахан тэрээһиммитигэр 21 уолан уолаттар көхтөөх кыттыыны ыланнар астынныбыт, сүргэбит көтөҕүлүннэ. Уолаттарбыт биир дойдулаахпыт, Арыылаах бөһүөлэгин олохтооҕо Федор Филиппович Ноговицын суруйбут, оллоонноон олорон олоҥхолоон эйээрэргэ сөптөөх, бэртээхэй ис хоһоонноох олоҥхолору оҕолорбут олус эппиэтинэстээхтик сыһыаннаһан, бүгүҥҥү тэрээһиммитин бэртээхэйдик киэргэттилэр. Федор Ноговицын 3 оҕолоох, оскуола — саадка охраннигынан үлэлии — хамсыы сылдьар. Онон Федор Ноговицыҥҥа улахан махталбытын тиэрдэбит, өссө да айымньылаах үлэн арыллан истин диэн баҕа санаа бастыҥын тиэрдэбит. Нэһилиэкпит инники кэскиллэрин, уолан уолаттарбыт күрэҕин өйөөбүт олохтоох дьаһалта баһылыгар Семен Тимофеевка, Сииттэ орто оскуолатын дириэктэригэр Андрей Новгородовка, кылаас салайааччыларыгар Агафья Дьяконоваҕа, Евдокия Винокуроваҕа, Ульяна Петроваҕа, Сардана Гуляеваҕа, Анастасия Сидороваҕа, Сардана Обутоваҕа, Захар Кривошапкинна, Мария Иннокентьевнаҕа, Римма Винокуроваҕа, Александра Степановаҕа, Анна Сивцеваҕа, кыттааччыларбыт көхтөөх төрөппүттэригэр, ону тэҥэ «Чуораанчык» уһуйаан сэбиэдиссэйигэр Ольга Александроваҕа, иитээччилэригэр Мария Новгородоваҕа, Галина Гуляеваҕа, Нария Алексееваҕа, тэрээһиннэрбитин өйөөн, спонсордыыр, үтүө санаалаах урбаанньыттарбытыгар Ольга Левинаҕа, Софья Николаеваҕа, Елена, Константин Александровтарга, күүс — көмө буолар «Алаһа» эбээлэр кулууптарыгар Мотрена Васильеваҕа, Анна Сивцеваҕа, Наталья Гуляева, Надежда Ермолаеваҕа, Татьяна Герасимоваҕа, Мария Обутоваҕа ис сүрэхтэн тахсар махтал маанытын аныыбыт. Бүгүҥҥү күрэхпит муҥутуур кыайыылаах аатын сүктэ, онус кылаас үөрэнээччитэ Сайан Сивцев. Иккис миэстэни — 4 кылаас үөрэнээччитэ Демид Расулов, үһүс бочуоттаах миэстэни Дима Егоров ылыан ыллылар. Кыайыылаахтар бары култуура дьиэтин үлэһиттэрин ааттарыттан, харчыннан бэлэх тутан үөрүүлэрэ үгүс.
«Бастын дьүһүйүү» Марианна, Иван Захаровтар туруорбут анал номинацияларын, иккис кылаас үөрэнээччитэ Саша Слепцов ылан үөрүүтэ улахан. Күрэххэ уолаттарын барытын кытыннарбыт Сардана Гуляева уонна Агафья Дьяконова кылаастара анал номинация иҥэриллэн, харчыннан бэлэх тутан оҕолорбут олус үөрдулэр. Бу күн олоҥхону өрө туппут уолаттарбытыгар анаан, бука бары дохсун ытыс тыаһынан эҕэрдэлэрин тириэртилэр.
Дьэ, ити курдук, кырачаан уолаттарбыт бука бары минньигэс бэлэх тутаннар, харчыннан бириэмийэ ыланнар санаалара көнньүөрдэ, үөрүүлэрэ үксээтэ. Өссө төгүл Кэбээйибит улууһун дьонун — сэргэтин Сомоҕолоһуу күнүнэн итиитик — истиҥник эҕэрдэлиибит, бука бары биир сомоҕо буолан иннибит диэки эрэллээхтик хардылаан иһиэҕиҥ диэн ыҥырабыт.
***
Марианна Сивцева
Источник: Дабаан
Источник: Аартык