Ойуур баһаарын утары охсуһар “Якутлесресурс” тэрилтэ маһы үүннэриэҕэ

Яков Яковлев салайааччылаах “Якутлесресурс” Сунтаардааҕы филиала олус сэргэхтик дьаһанан олорор. Көрөргүт курдук аныгы тииптээх мас тутуу арааһыттан баар, ойуурга сылдьарга аналлаах 18 единица тиэхиньикэ араас көрүҥэ хараллан турар. Баһаар буолбут сирин – ойууру чөлүгэр түһэрэр соруктаах быйыл теплица туттан эһиилгиттэн мас үүннэрэн саҕалыахтара.

Маннык тэрилтэ республика 23 улууһугар баар. Улуус баһылыга Анатолий Григорьев уонна 1-кы солбуйааччыта Павел Григорьев үлэни-хамнаһы билистилэр. Механик Прокопий Потапов көрсөн, материальнай базаны көрдөрдө. 

Манна 32 киһи үлэлиир. Ойуур баһаарын сезонугар ыам ыйыттан балаҕан ыйыгар диэри ойуурга сылдьар дьон кыһыҥҥы кэмҥэ олорор дьиэ, гараж тутуутугар сылдьаллар. Тэрилтэ бэйэтэ маһы эрбэтэр, таҥастыыр оборудованиелаах. Онон барыта бэйэ күүһүнэн оҥоһуллар.

***
Сунтаар улууhун пресс-службата