Аата биллибэт киһи үҥсүүтүнэн суут уурааҕынан улуус баһылыга үлэтиттэн тохтотулунна

2023 сыл күһүнүгэр Уус-Алдан улууһугар улуус баһылыгын дуоһунаһыгар быыбар буолан ааспыта. Быыбарга сүрүннээн икки киһи күөн көрсүбүттэрэ, ол курдук улуус улэлии олорор баһылыга Федотов Алексей Васильевич, икки болдьоххо улэлээн баран үһүс болдьоҕор талыллаары уонна Мүрү нэһилиэгин ус болдьох устата баһылык быһыытынан салайан кэлбит Аммосов Василий Иванович талыллаары.  Тыҥааһыннаах  быыбар түмүгүнэн Аммосов В.И. ырааҕынан кыайан улуус баһылыгын дуоһунаһыгар чиэстээхтик талыллыбыта. Ол курдук быыбарга кыттыбыт дьон 55,21% куоластарын Аммосов В.И. биэрбиттэрэ, Федотов А.В. куолас 42,78% ылбыта. Василий Иванович улуус баһылыгын дуоһунаһыгар сылтан ордук кэм үлэлээн улууһун дьонун өйөбүлун өссө чиҥэтэн биэрэн быыбарга ылыммыт програматын олоххо киллэрэр үлэлэрин улуус саҥа талыллыбыт депутаттарын кытта биир уопсай тылы булан ситиһиилээхтик үлэлээтэ(манна тоһоҕолоон эттэххэ саҥа талыллыбыт улуус депутаттара быыбарга аҥардара Василий Ивановиһы утары үлэлээбиттэрэ, олору кытта биир тылы булуу саҥа баһылык ситиһиитэ буолар), ол курдук өр быһаарыллыбакка турбут паром сырыытын “Кыһыл Маягынан” сырытыннарда, манна сэбиэскэй саҕаттан кыайтарбатах Мэҥэ-Хаҥалас улууһун салалтатын кытта биир тылы булла, онон сайынын киин куораты кытта сибээс түргэтээн тупсар кыахха киирдэ. Василий Иванович тутуу үөрэхтээх, онон улууһа сайдарыгар бары кыаҕын, билиитин, уопутун туһанан элбэх үлэни сылтан ордук кэм иһигэр ситистэ, ол курдук өр хамнаабакка турбут улуус балыыһатын иккис уочаратын тутуутун бырайыактааһынын  саҕаланарын ситистэ; Өнөр, Курбуһах, Танда суолларын саҥардыы, улууспут киинэ  Бороҕон бөһүөлэгин Ленин аатынан киин уулуссатын аспааллааһынын 2025 сылга саҕалааһын; Суотту, Чэриктэй, Түүлээх уонна Танда нэһилиэктэригэр 2 саҥа тимир  муосталары тутуу, 2 тимир муостаны капремоннааһын; улууска 2025 сылы тыа хаһаайыстыбатын сылынан биллэрии уонна бу салааны улуус өттүттэн күүскэ өйөөһун, ол курдук бэйэ туорахтаах бурдугуттан комбикорм саҥа сыаҕа тутуллан дьон биһирэбилин ылбытын; Суотту нэһилиэгэр чааһынай ыалларга автоновнай газтааһыны киллэрии; улуус киинигэр Бороҕон бөһүөлэгэр “Ыраас уу” программатыгар бырайыактааһын үлэтин киллэрии уонна да атын элбэх үлэлэр бардылар. (Даннайдар улуус баһылыга 2024 сыллаах үлэтин отчуотуттан ылыныллылар). Василий Иванович өссө да элбэх былааннара инники толоруохтаах үлэлэригэр бааллара аата биллибэт киһи прокуратураҕа үҥсүүтүн түмүгэр улуус суута кинини үлэтиттэн тохтоппутунан туолбат кыахха киирдилэр. Прокуруор улуус депутаттарыгар баһылыгы үлэтиттэн тохтотор туһунан сайабылыанньа түһэрбитин депутаттар биир киһи курдук сөбулэспэттэрин биллэрбиттэрэ, соҕотох биир депутат туттунарын биллэрбитэ, онон норуот талбыт депутаттара баһылыктарын өйүүллэрин, кини ыытар үлэтин кытта сөбүлэһэллэрин биллэрбиттэрэ. Уус-Алдан улууһун быыбардааччылара баһыйар үгүс өттүлэрэ суут уурааҕын кытта сөбүлэспэттэрин биллэрэллэр, Василий Иванович Саха Республикатын Үрдүкү Сүүтүгар ааһынар түбэлтэтигэр кинини өйүүллэрин биллэрэллэр, ол курдук улуус элбэх общественай тэрилтэлэриттэн, нэһилиэктэртэн түмсүүлэр Василий Иванович салгыы үлэлииригэр баҕаран кинини өйүүр дьон туоһу суруктарын Саха Республикатын Үрдүкү Сүүтүгар ыытарга сананнылар. Быыбардааччылар үгүс бырыһыаннара Василий Иванович буруйа суоҕун Үрдүкү Суут сөпкө быһаарыа диэн эрэнэллэр, улууһун инники сайдыытын түстээн салгыы үлэлиэҕэ диэн улахан эрэллээхтэр уонна баҕалаахтар. ***
Аркадий Охлопков, 1-кы Хоро нэһилиэгин олохтооҕо
Источник: Аартык