Хаҥалас эбии түөрт норуот маастарданна

Саха сиригэр Маастардар күннэрэ Улуу Кыайыы 80 сылыгар ананан тэрээһиннээхтик ыытылынна. Хаҥаластан уран тарбахтаахтар, омукпут үйэлэртэн тиийэн кэлбит үгэстэрин салгыыр мас, туос, тимир оҥоһуктары айар дьоммут Дьокуускайга быыстапкаларга, дьаарбаҥкаларга, ону сэргэ сиэдэрэй таҥастаахтарбыт киин уулуссанан сэлэлии хаамыыга көхтөөхтүк кытыннылар.

Дьаныардаах иистэнньэҥнэрбит, уустарбыт быыстапкаларга ситиһиилэннилэр. Түмүктүүр тэрээһиҥҥэ Хаҥаластан түөрт киһи маастар үрдүк аатын ылла. Эҕэрдэлиибит – СӨ норуотун маастара ааттаммыт Игнатий Егорович Константиновы, Светлана Петровна Павлованы, СӨ норуотун уус-уран оҥоһуктарын маастардарынан буолбут Евдокия Дмитриевна Антипинаны, Валериана Васильевна Никифорованы!

“Якутия мастеровая” быыстыпкаҕа Кыһыл Үрүйэттэн Дария Константинова уонна Евдокия Антипина «национальнай иис» номинацияҕа ат симэҕин айан омук быһыытынан ииспитигэр бастыҥ үлэлэрин иһин дипломунан бэлиэтэннилэр, быыстапкаҕа Елена Ефимова хоруомканан үлэлэрэ, Демьян Колодезников мастан, Светлана Баишева кылтан оҥоһуктара, Виктория Ноговицына ииһэ о.д.а. үлэлэр дьон болҕомтотун тартылар, үрдүктүк сыананнылар.

***

Людмила Аммосова