Кристина Семенова: «Хаһыат курдук ураты эйгэҕэ чахчы бэриниилээх эрэ дьон үлэлиир»
Национальнай Бэчээт күнүгэр өрөспүүбүлүкэ уонна улуус иһитиннэрэр-көрдөрөр сириэстибэлэрин үлэһиттэрэ «Бэчээт туйгуна» бэлиэнэн наҕараадаланнылар. Туйгун буолуу бэлиэтин инновация, цифровой сайдыы уонна инфокоммуникационнай технологиялар миниистирэ Василий Ефимов туттарда.
Түөскэ кэтиллэр бэлиэ Бырабыыталыстыба уораҕайыгар үөрүүлээх быһыыга-майгыга барыта 7 киһиэхэ туттарылынна. Кинилэр истэригэр «Үөһээ Бүлүү» хаһыат сайдыытын туһугар 15 сыл дириҥ хорутуулаахтык үлэлии сылдьар хаһыат кылаабынай эрэдээктэригэр Кристина Семеноваҕа ананна.
«Үөһээ Бүлүү» хаһыат кылаабынай эрэдээктэрэ Кристина Семенова:
Мин саныахпар, хаһыат курдук уустук уонна ураты, бары өттүнэн интэриэһинэй эйгэҕэ чахчы бэриниилээх уонна идиэйэ туһугар, сахалыы тыллаах сурук-бичик, хаһыат баар буоларын туһугар туруулаһар эрэ дьон үлэлиир диэн сыаналыыбын. Ол да курдук, үлэбин наһаа таптыыр буоламмын, 15 сыл Бэчээт эйгэтигэр үлэлээбиппин билбэккэ да хааллым. Түгэнинэн туһанан, «Сахабэчээт» тэрилтэ генеральнай дириэктэрин Ньургуйаана Стручкованы, бары үлэһиттэри, итиэннэ бэйэм кэлэктииппин Бэчээт күнүнэн эҕэрдэлиибин. Этэҥҥэ буолуоҕуҥ!
Кылаабынай эрэдээктэр Кристина Афанасьевна этэринэн, бэриллибит сорудахтары кэмигэр толорон, кумааҕы хаһыат симэлийбэтин, ааҕааччыны элбэтэр, интэриэһиргэтэр, нэһилиэнньэҕэ хаһыаты таптатар туһугар туох-баар үлэ барыта ол тула туһуланар.
Ол курдук, «Үөһээ Бүлүү» олохтоох эрэдээксийэ нэһилиэнньэттэн, тэрилтэлэртэн дьоҕус кинигэлэргэ, онтон да атын таһаарыыларга, оҥоһуктарга сакаас ылан, таһаарыылаахтык үлэлиир биир кэскиллээх эрэдээксийэлэртэн биирдэстэрэ буолар.
Бэлиэтээн этэр буоллахха, «Үөһээ Бүлүү» хаһыат бастакы нүөмэрэ 1943 сыллаахха атырдьах ыйын 29 күнүгэр «Үөһээ Бүлүү большевига» диэн ааттанан тахсыбыта. 1953 сыл тохсунньу 1 күнүттэн «Коммунизм суолунан» диэн ааттанан тахсар буолбута. Онтон 1963 сыл кулун тутар 15 күнүттэн «Коммунизм сардаҥата» ааты ылыммыта, 1991 сыллаахха атырдьах ыйын 27 күнүгэр хаһыат «Үөһээ Бүлүү» диэн саҥа аатынан тахсыбыта.
Валентина Догоюсова
День национальной печатиСахапечать