Сунтаар улууһуттан 62 спортсмен Манчаары оонньууларыгар айаннаата
Успуорт национальнай көрүҥнэригэр ыытыллар XXII Спартакиадатыгар — “Манчаары оонньууларыгар” Сунтаар улууһуттан кыттар спортсменнар Таатта ытык сиригэр айан туттулар. Кинилэри Сергей Зверев-Кыыл Уола мэҥэ бэлиэтиттэн алгыс анаан атаардылар, диэн «Сунтаар сонуннара» суруйар.
Норуокка Манчаары оонньууларын “саха олимпиадата” диэн ааттыыллар. Урукку сылларга «Манчаары оонньууларыгар» Сунтаар хамаанданан ситиһиитэ сэмэй. 26 сыл анараа өттүгэр 1999 сыллаахха эмиэ Тааттаҕа буолбукка Сунтаар улууһа 4 үрдэл буолбута. 2013 с. Чурапчыга буолбукка Сунтаар улууһа хамаанданан 3 үрдэл буолары ситиспитэ. Быйылгы Манчаарыга саамай элбэх 119 путевканы Чурапчы улууһа ылан турар. Спартакиадаҕа Сунтаар улууһуттан 62 спортсмен 68 путевканы тутан 11 көрүҥ баарыттан 10 көрүҥҥэ күрэхтэһиэхтэрэ. Ол курдук, саамай элбэх спортсмен хапсаҕайга — 12, мас тардыһыытыгар -17 кыттыахтара.
Афанасий Жараев — успуорт бэтэрээнэ, тириэньэр. Манчаары оонньууларыгар гиирэ успуордугар судьуйалыы айаннаата: “Быйылгы Манчаары оонньууларыгар үс иһигэр киирбит диэн баҕа санаалаахпыт. Буулдьанан ытыыга, хапсаҕайга, төрүт оҕунан ытыыга үчүгэй көрдөрүүлэри ситиһиэхпит диэн эрэнэбин”.
“Манчаары оонньууларыгар” дьиэ кэргэнинэн кыттааччылар бааллар. Ол курдук, саха дэгит күрэһигэр Мичийэ, Тимофей Большаковтар, Кириэстээх нэһилиэгин баһылыга Александр Григорьев хапсаҕайга, уола мас тардыһыытыгар, буулдьанан ытыыга Александр Николаев кыыһынаан, кэргэнэ Светлана тириэньэр, Сиэйэ нэһилиэгиттэн икки көлүөнэ хапсаҕайдьыт бырааттыылар Семеновтар кыттыахтара.
Хас биирдии спортсмеҥҥа “Аар баҕах” ойуулаах спортивнай пуорма, суумка, атах таҥаһа биэрдилэр. «Манчаары оонньуулара» успуорду таптааччыларга умнуллубат, кэрэ түгэннэри бэлэхтээтин!
Мира Афанасьева
Игры Манчаары