Амма амарах дьоно буойуҥҥа “Нива” массыына ыыттылар

Бу күннэргэ Амма улууһун амарах сүрэхтээх уопсастыбанньыктара байыаннай дьайыыга сылдьар биир дойдулаахтарыгар «Дьяк» диэн позывнойдаах буойуҥҥа “Нива” массыына атыылаһан ыыттылар. Массыынаны Дьокуускайга Биир кэлим координационнай кииҥҥэ аҕалан туттардылар. Бу туһунан «Амма олоҕо» хаһыат суруйар. 

Массыына атыылаһыытыгар Аҕа дойду көмүскэлигэр сылдьар буойуннар дьиэ кэргэттэрин кэмитиэтин Амма улууһугар “Амарах сүрэх” уопсастыбаннай хамсааһын (сал. Р.В. Алексеева) күүс-көмө буолла. Ол курдук, түмсүү көҕүлээһининэн байыаннай дьайыыга сылдьар Болугуртан төрүттээх “Дьяк” позывнойдаах буойуҥҥа көмө буолар сыыдам сырыылаах “Нива” массыынаны атыылаһыыга уопсайа 253 000 солк хомуйдулар. Ити иһигэр “Амарах сүрэх” түмсүү тэрийбит “Амма эһигини кытта” аахсыйаттан хаалбыт 100 000 солк уонна урбаанньыттар Руслан Федотов,  Николай Борисов,  Афанасий Алексеев, Спартак Трофимов, Рихард Барабанов, Людмила Куприянова, Болугур нэһилиэгин дьаһалтата, ону кытта “Амарах сүрэх” волонтердара харчынан көмөлөрүн оҥордулар.

“Амарах сүрэх” түмсүү көҕүлээһинэн атыылаһыллыбыт “Нива” массыына сотору кэминэн байыаннай дьайыыга кыттан дойдутун көмүскүү сылдьар “Дьяк” позывнойдаах буойуҥҥа айанныа. Түгэнинэн туһанан, бары көмөлөспүт дьоҥҥо махталбын тириэрдэбин. Кытаатыҥ бу курдук түмсүүлээх буолуҥ. Бу массыына антах тиийэн улахан абыраллаах буолуо. Куһаҕан да суолунан сылдьарга диэн анал көлүөһэ ылан олордубуттар. Бу барыта биһиги уолаттарбытыгар олус көмөлөөх буолуо. Сотору кэминэн Новоазовск куоракка айанныа. Барҕа махтал!” — диэн этэр өр кэмҥэ тирэх пууну салайбыт, Амма улууһун Аҕа дойду көмүскэлигэр сылдьар буойуннар дьиэ кэргэттэрин кэмитиэтин волонтера Петр Лебедев.

“Амма олоҕо” хаһыат

УлуусМедиа