Өймөкөөннөр Манчаары оонньууларыгар кыттарга бэлэмнэр
Өймөкөөн улууһун сүүмэрдэммит хамаандата Манчаары оонньууларыгар успуорт 6 көрүҥэр 18 путевкалаах. Быйылгы күрэхтэһиилэргэ улуус бары нэһилиэктэрин спортсменнара кыттыахтара, диэн суруйар «Северная заря» хаһыат.
Кинилэр ортолоругар өрөспүүбүлүкэҕэ хотугу многоборьеҕа тэҥнээҕин булбатах Георгий Софронов, аатырбыт хапсаҕайдьыт Виктор Княжев, мас тардыһыытыгар өрөспүүбүлүкэҕэ аатын дорҕоонноохтук ааттаппыт Айыына Плотникова бааллар.
Улуус баһылыга Александр Оконешников Манчаары оонньууларыгар кыттар күрэсчиттэри кытта көрүстэ уонна улуус аатын ааттатар экипировканы туттарда.
— Бүгүҥҥүттэн ыла эһиги Өймөкөөн улууһун чиэһин көмүскүүр дьоһуннаах соругу ылынаҕыт.
Биир дойдулаахтаргыт иннигэр икки бүк эппиэтинэс — биһиги эһиэхэ, бастыҥ ыччаттарбытыгар, эрэнэбит. Онон бастатан туран, спортсмен быһыытынан бэйэҕитин бэрээдэктиир, хонтуруоллуур суолу тутуһуҥ, туран-олорон, эрчимнээхтик туттуҥ-хаптыҥ. Ситиһии бэрт сыранан кэлэрин умнумаҥ, бары бэйэ-бэйэҕитин өйөһөн, биир хамаанда буолуҥ! Кытаатан улуускут аатын инники күөҥҥэ тута сылдьан, бастыҥнар ааттарыгар ааттатыҥ!
Улууспут аатын инники күөҥҥэ илдьэ иһэр спортсменнарбытыгар эрэлбит күүстээх. Эһиэхэ чаҕылхай көрдөрүүлэри, сөҕүмэр кыайыылары баҕарабын! — диэтэ.
Ааттаах-суоллаах норуот эмчитэ Виктор Кривошапкин улуус спортсменнарын анаан сахалыы алҕаата.
Өймөкөөнү ааттаппыт Дугуйдан Винокуров ыччаты кытта көрүстэ, санаатын атастаста.
Өймөкөөн улууһун пресс-сулууспата
Игры МанчаарыОймяконский район