Мындаҕаайы олохтоохторо байыастарга көмөлөрө уҕараабат

Ол курдук, Мындаҕаайы бөһүөлэгэр “Алаһа” дьахталлар уопсастыбаннай түмсүүтэ, кулун тутартан саҕалаан, Дьокуускай куорат “Народный фронт” хамсааһын үлэтигэр кыттыһан, 20 устуука хаххалыыр сиэккэни өрүүгэ туруммута. Бу туһунан «Саҥа олох» хаһыат сырдатар. 

Күн-бүгүн 14-с сиэккэлэрин өрөн түмүктээн эрэллэрин туһунан, түмсүү бэрэссэдээтэлинэн быйылгыттан талыллан үлэлиир Мария Дьячковская иһитиннэрдэ.

“Бу иннинэ нэһилиэкпит дьоно сэргэтэ, буойуттарбытыгар анаан “Эргиллиэм хайаан да!” диэн харысхал нобуордарын, эмтээх оттору, ону таһынан 80-ча мөһөөччүгү, 70-тан тахса тыһыынча харчы, дроннартан байыаннай тиэхэньикэни көмүскүүргэ нэһилиэк эр дьонуттан 84 устуука илими, араас эми-тому хомуйан ыыппыттара. Билигин биһиэхэ 4 түөлбэ: “Сарыал”, “Бэс”, “Сардаҥа”, “Төрүт” —  тэҥинэн үлэлэһэ олороллор о.э күн аайы сарсыарда 10 чаастан саҕалаан ыкса киэһээҥҥи диэри 8-тыы киһи иккилии станокка сиэккэни өрөллөр.

Күҥҥэ быһа холоон 40-ча киһи мустар. Билигин сайыҥҥы сынньалаҥ буолан Мындаҕаайыбытыгар сиэннэр бөҕө кэллилэр, дьороччу улааппыт оскуола кыргыттара, устудьуон оҕолорбут күүс-көмө, илии-атах буолан абыраатылар. Дьон-сэргэ түмсэрэ, бука бары санааларын ууран, бииргэ үлэлиирбит-хамныырбыт – бу буоллаҕа, Дойдубут туһугар патриотизмныы сыһыаммыт”, — диэн Мария Андреевна, өрүү буоларын курдук лоп-бааччы, тиэтэлэ суох сэһэргээтэ.

Манна даҕатан эттэххэ, Чурапчы улууһугар Мугудайга, Хайахсыкка, Мырылаҕа маннык хабааннаах үлэлэр күүскэ ыытыллаллар.

Сэмэн ЖЕНДРИНСКЭЙ. Хаартыска “Алаһа” түмсүү тус архыыбыттан

УлуусМедиа