Судаарыстыба уонна чааһынай тутуу бииргэ үлэлээһинин түмүгэ – сырдык, сылаас уһуйаан
Болугур нэһилиэгэ улуус иккис улахан нэһилиэгэ буолар. Ол эрээри аналлаах уһуйаана суох буолан хонтуора буолан турбут дьиэлэргэ оҥостон 2017 сылга диэри үлэлээн-хамсаан кэлбиттэрэ. Судаарыстыба уонна чааһынай урбаан бииргэ үлэлээһиннэрин түмүгэр манна толору хааччыллыылаах уһуйаан үлэҕэ киирбитэ ахсыс сылыгар барда, «Амма олоҕо» хаһыат суруйар.
“Биһиги “Колосок” уһуйааммыт 1958 сыллаахха тэриллибитэ. Онно урукку хонтуора дьиэтин көһөрөн киллэрэн дьааьыла сад үлэтин саҕалаабыта. Дьэ ол кэмтэн урукку хонтуора дьиэлэргэ 2017 сылга диэри үлэлээбиппит. Саҥа уһуйааны оччолорго сэбиэдиссэйинэн улэлии олорбут, өрөспүүбүлүкэ үөрэҕириитин туйгуна, билигин бочуоттаах сынньалаҥҥа олорор Анастасия Николаевна Никифорова туруорсубута. Саҥа уһуйаан наадатын туһунан элбэх отчуоттарга төрөппүттэр да эмиэ этэллэрэ. Манна оччолорго нэһилиэкпит баһылыга Вячеслав Егорович Потапов саҕалаан, онтон Степан Николаевич Кузьмин кэлэн ситэрэн, улуус салалтатын кытта күүскэ үлэлэспитэ. Ол түмүгэр “Судаарыстыбаннай чааһынай партнерство” бырагыраамаҕа киирэн уһуйааммыт сылтан ордук эрэ кэм иһигэр тутуллан үлэҕэ киирэн олохтоохтор, үлэһиттэр үөрүүбүт улахан этэ”, — диэн уһуйаан сэбиэдиссэйэ Марфа Афанасьева оччотооҕу кэми санаан ылар.
Уһуйаан 75 миэстэлээх, оҕолор түөрт бөлөҕүнэн сылдьаллар. Чэпчэки конструкциянан аныгы тутуу матырыйаалынан тутуллубут дьиэ уопсай иэнэ 998 кв.м. иэннээх. Тутууну “Адгезия” ХЭТ ( билигин “Северстройторг” ХЭТ) кылгас болдьоххо тутан үлэҕэ киллэрбитэ. Кырачаан олохтоохтор сылдьар дьиэлэрэ аныгы ирдэбилгэ эппиэттээн, толору хааччылыылаах. Аны үлэҕэ киирэригэр аһыыр иһититтэн саҕалаан оҕо оонньууругар, утуйар таҥаһыгар, бэл уруучукатыгар, компьютерыгар тиийэ хааччыллыбыта. Этэргэ диэри, киир да үлэлээ. Онон төрөппүттэр, үлэһиттэр, нэһилиэк олохтоохторо үөрүүлэрэ улахана. Буолумуна, бу күннэргэ диэри анал дьиэтэ суох уһуйаана суох олорбут нэһилиэккэ, барыта толору хааччыллыылаах, оҕо сайдарыгар, билиини ыларыгар, кэрэҕэ уһуйалларыгар бэртээхэй бэлэм эбийиэк киириитэ ситиһии.
“Биһиги ыаллар үс оҕобут бары Болугурдааҕы «Колосок» уһуйааҥҥа иитиллэн таҕыстылар. Иитиллээччилэр сыллааҕы үөрэх дьылын бириэмэтигэр араас сайдыылаах куруһуоктары таланнар дьарыктаналлар. Ону таһынан сыл устата хас биирдии тэрээһиҥҥэ оҕолорбут ырыа, хоһоон, үҥкүү бөҕө үөрэтэннэр сайдаллар. Уһуйааммытыгар сылын аайы төрөппүт оҕотунаан кыттыыны ылар «Аһаҕас аан» күннэрэ тэриллэллэрэ үтүө үгэс буолла. Бу күн оҕо сайдарыгар аналлаах араас аныгы оонньуулары, инструменнары туттан оҕо төрөппүтүнээн дьарыктаналлар. Иитээччилэр оҕо туох дьоҕурдааҕын таба көрөннөр улуустааҕы, өрөспүүбүлүкэтээҕи, Арассыыйатааҕы, ону таһынан аан дойду таһымнаах араас хайысхалаах күрэхтэргэ дьарыктааннар кытыннараннар ситиһиилэнэллэр.
Уһуйаан оҕолоругар сылын аайы испэктээх туруораннар күрэхтэргэ кыттаннар өрөгөйдөнөллөр. Хас саас аайы ыам ыйыгар, уһуйаан бары үлэһиттэрэ иитиллээччилэрин кытта отчуоттуур кэнсиэр тэрийэллэр. Кэнсиэргэ кырачаан иитиллээччилэр аан бастаан улахан сыанаҕа тахсаннар сайдаллар, төрөппүттэрин, дьоннорун үөрдэллэр. Бу барыта нэһилиэкпитигэр саҥа уһуйаан киирэн ситиһиллэр. Оҕолорбут сырдык, ыраас, толору хааччыллыылаах дьиэлээх-уоттаах буоланнар биһиги төрөппүттэр эмиэ астынабыт, үөрэбит уонна тутааччыларбытыгар, салалтабытыгар махталбытын биллэрэбит”, — диэн төрөппүт Зоя Корнилова санаатын үллэһиннэ.
Бу курдук тутууну ыытыыга судаарыстыба чааһынай тутуу тэрилтэтин кытта сөбүлэһии түһэрсэн үлэлиирэ үтүө түмүктэрдээх. Тэрилтэ бэйэтин суотугар тутан баран, ол ороскуотун судаарыстыба толуйан, баҕар хаалан да хаалыан сөптөөх эбийиэк олоххо киирэр кыахтанар. Болугурдар бу бырагырааманы таба туһанан билигин ахсыс сылларын сылаас, ыраас уһуйааннаахтар. Быстах өрөмүөнүн тутууну ыыппыт тэрилтэ кэлэн көрөн, бириэмэтигэр көннөрөн иһэр. Онон үлэһиттэр махтал тылларын тириэрдэллэр. Үтүө сыһыан өссө да салҕанан бара турар.
“Амма олоҕо” хаһыат
ГЧП