Тыа хаһаайыстыбатын уонна Үөрэх министиэристибэлэрэ тыа сирин сарсыҥҥы түөрэҕин кыттыһан түстүүргэ сүбэлэстилэр

Мэҥэ Хаҥалас улууһун Дьабыыл нэһилиэгэр Нуораҕанаттан чугас Чаачыгыйга олохсуйбут “Илгэ” диэн оҕо сайыҥҥы лааҕырыгар Тыа хаһаайыстыбатын, ас-үөл бэлиитикэтин уонна Үөрэх, билим министиэристибэлэрин холбоһуктаах кэллиэгийэлэрэ ыытылынна. Тыа сирэ сайдарыгар тыын суолталаах икки биэдэмистибэ салайааччылара, исписэлиистэрэ уонна өрөспүүбүлүкэ тыатын хаһаайыстыбатын тэриллиилэриттэн, аграрнай үөрэхтээһиҥҥэ кыһаларыттан бэрэстэбиитэллэр, барыта 100-тэн тахса киһи, түмүллэн сүбэлэһэн-мунньахтаан аастылар.

Бастакы күн иккис аҥаарыгар сиэссийэлэринэн “төгүрүк остуол” киэбинэн санаа атастаһыыта, кэпсэтии тэрилиннэ. Ол курдук, “АПК-ка каадырдар” федеральнай бырайыак: саҥа көрүү” сиэссийэни тыа хаһаайыстыбатын уонна ас-үөл бэлиитикэтин миниистирин солбуйааччы Сахайаана Павлова, “Саха Өрөспүүбүлүкэтигэр 2035 сылга диэри агротехнология хайысхалаах үөрэх кэнсиэпсийэтэ” сиэссийэни АПК-ы ресурсанан хааччыйыы киинин дириэктэрин солбуйааччы Семен Плотников, “АПК саҥа технологиялара: роботтааһын, сыыппара технологиялар, пилота суох аппарааттар” сиэссийэни Саха сиринээҕи ТХНЧИ дириэктэрэ Михаил Черосов, “АПК-ы сайыннарыы тирэҕэ – ыччат” сиэссийэни эдэр учуонай Михаил Миронов салайан ыыттылар.

Иккис күн бастакы аҥаарыгар холбоһуктаах кэллиэгийэ мунньаҕар тыа хаһаайыстыбатын уонна ас-үөл бэлиитикэтин миниистирэ Артем Александров салааны каадырынан хааччыйыы бэлиитикэтин, үөрэх уонна билим миниистирэ Ньургууна Соколова аграрнай үөрэхтээһин тустарынан дакылааттарын иһитиннэрдилэр. Үөрэх салаатыгар хос дакылааты “Народное образование” сурунаал сүрүн эрэдээктэрэ, Арассыыйа үөрэҕириигэ министиэристибэтин уопсастыбаннай сэбиэтин чилиэнэ, Арассыыйатааҕы билим академиятын үлэҕэ иитиигэ уонна аграрнай үөрэхтээһиҥҥэ хамыыһыйатын салайааччытын солбуйааччы Елена Шишмакова аахта.

Сиэссийэлэр салайааччылара ханнык боччумнаах этиилэр киирбиттэрин билиһиннэрбиттэрин кэнниттэн Федерация Сэбиэтин аграрнай, ас-үөл бэлиитикэтигэр уонна айылҕаны туһаныыга кэмитиэтин бэрэссэдээтэлин солбуйааччы Егор Борисов АПК-ы каадырынан хааччыйыы эйгэтигэр федеральнай таһымҥа туох-хайдах бэлиитикэ ыытылларын билиһиннэрдэ. Быстахтык ыллахха, Егор Афанасьевич Саха сиригэр хаһаайыстыбалар олус бытархай буоланнар, федеральнай киин ыытар бэлиитикэтэ сорох түгэннэргэ сөп түбэспэтин бэлиэтээтэ уонна маннык киэҥ хабааннаах мунньах ыытыллыбытын биһириирин биллэрдэ.

Холбуу туттахха, бүтүн биир күннээх мунньах хаамыытыгар хаайтара-тууйулла сылдьар элбэх санаа этилиннэ. Икки тутаах биэдэмистибэнэн кыһалҕа баһаам буоллаҕа. Оҕону кыра эрдэҕиттэн үлэҕэ иитии, ыччаты тыа хаһаайыстыбатыгар сыһыаннаах идэҕэ үөрэтии, эдэр дьону тыа сиригэр олохсутуу курдук тыҥаан турар кыһалҕалары уталыппакка, биир сүбэнэн быһаарыахтаахтарын кэм-кэрдии эрэйэр.

Этэргэ дылы, биир төбө – үчүгэй, икки – өссө ордук. Үгэс быһыытынан кэллиэгийэ мунньаҕын түмүгүнэн уураах ылыллыахтаах этэ эрээри, оробуочай бөлөх киирбит этиилэринэн көрөн, эбэн-чочуйан биэрэригэр хааллардылар.

Василий Никифоров

Тыа хаһаайыстыбатын уонна ас-үөл бэлиитикэтин министиэристибэтин пресс-сулууспатын хаартыскаҕа түһэриилэригэр – холбоһуктаах кэллиэгийэ түгэннэрэ.

УлуусМедиа