Ил Дархан Айсен Николаев: «Былааннаммыт үлэ эрдэттэн барбыта көстөр»
От ыйын 7-12 күннэригэр Ытык Күөлгэ Күрэс төрүт көрүҥнэригэр XXII «Манчаары оонньуулара» хас эмэ тыһыынчанан сэргээччини түмэ тарта.
«Биһиги өрөспүүбүлүкэбит, итиэннэ Таатта улууһа Күрэс төрүт көрүҥнэригэр XXII-с Манчаары оонньууларын тэрийэн ыытыыга бэлэмнэнэн, былааннаммыт үлэ эрдэттэн барбыта көстөр. Ол курдук, хаһааҥҥытааҕар да үчүгэйдик, үлэ кэмигэр, оннуттан былааннанан, спортивнай эбийиэктэр үлэҕэ киирдилэр», — диэн Ил Дархан Айсен Николаев үөрүүтүн үллэстэр.
Бүгүн арыллыбыт Алексей Егорович Турнин аатын сүгэр спорт дыбарыаһа Саха сиригэр, ол эбэтэр тыа сиригэр саамай баараҕай уораҕай буолар. Аҕыс тыһыынча иэннээх спорт саалатыгар санаа хоту барыта баар: сүүрэр былаһаакка, дьарыктанар араас хайысхалаах саалалар, аэробика, тир, футбол көрүҥнэрэ барыта биир сиргэ түмүллүбүттэрэ олус үчүгэй.
«Ол иһин мин бу дыбарыастан күүстээх күрэсчиттэр үүнэн-сайдан тахсыахтарыгар саарбахтаабаппын. «Дьулуруйар Ньургун Боотур» стадион 2023 сыллаахха тутуута саҕаланан, бүгүн номнуо аанын тэлэччи арыйда. Итиэннэ Ытык Таатта сиригэр спортивнай эбийиэктэр эрэ буолбакка, кэнники сылларга социальнай хайысхалаах элбэх тутуулар дьэндэйбиттэрэ киһини үөрдэр. Мин санаабар, бу оонньууттан куорсун анньынан, Таатта улууһа эрэ буолбакка, бүтүн Сахабыт сирэ спорт эйгэтигэр кэскиллээх сайдыыга дуорааннаах аатын ааттатыа, кыайыылаах-хотуулаах суолун тэлиэҕэ диэн бэлиэтиибин», — диэн Айсен Николаев тоһоҕолоон бэлиэтээтэ.
Санатан эттэххэ, Спартакиада бырагырааматыгар спорт 11 көрүҥэр: хапсаҕайга, мас тардыһыыга, ыстаҥаҕа, чэпчэки атлетикаҕа, саха дэгит күрэһигэр, хоту дэгит күрэһигэр, остуол оонньууларыгар, киирэни анньыыга, буулдьанан ытыыга, төрүт оҕунан ытыыга, ат сүүрдүүтүгэр 1662 күрэхтэһээччи илин-кэлин түсүһэн, пьедестал муҥутуур үктэлигэр турар иһин күөн көрсөр.
Игры Манчаары