«Манчаары Оонньууларыгар ытык ыалдьыт буолбуппутуттан үөрдүбүт»

ХХII-с Манчаары Оонньууларын арыллыытыгар Ил Дархан Айсен Николаев таһыгар олорбут сахалыы таҥастаах ис киирбэх кыысчааны бэлиэтии көрбүт буолуохтааххыт. Ити Дьокуускай куорат Чиряевтар ааттарынан национальнай гимназия туйгун үөрэнээччитэ, анал байыаннай дьайыы кыттыылааҕын оҕото Диана Винокурова. Диана ийэтэ Сардана Владимировна бэлиэ түгэҥҥэ кыыһынаан уонна уолунаан бочуоттаах ыалдьыт быһыытынан ыҥырыллан, чиэстэнэн-бочуоттанан сылдьыбыттарын туһунан үөрэ-көтө кэпсээтэ.

— Кыыһым Диана Чиряевтар ааттарынан Дьокуускай куорат национальнай гимназиятын 4-с, оттон уолум Миша эмиэ ити гимназия маҥнайгы кылааһын ситиһиилээхтик үөрэнэн бүтэрдилэр. Аҕабыт — Михаил Иванович Винокуров — Уус Алдан Курбуһаҕыттан төрүттээх, анал байыаннай дьайыы кыттыылааҕа этэ.

Манчаары Оонньууларыгар Ил Дархан ыҥырбыт диэн сураҕы нэдиэлэ иннинэ истэн соһуйбуппут уонна долгуйбуппут. Бу күрэххэ кэлэр былааммыт суох этэ. Ону суһаллык хомунан, кэлбиппит.

Диана туһунан кэпсиир буоллахха, кыыһым бастакы кылаастан саха төрүт остуол оонньууларынан — хабылыгынан, хаамысканан дьарыктанар. Тренерэ Белолюбская Надежда Николаевна наһаа үчүгэйдик дьарыктыыр, кылаас салайааччытын курдук оҕону сайыннарыыга туох баар күүһүн-сыратын уурар, төрүт көрүҥнэр киэҥ эйгэҕэ тарҕанарыгар наьаа кыһамньылаахтык үлэлиир.

Ону таһынан Диана 2-с кылаастан волейболынан дьарыктанар, уһуйааччыта — республикаҕа биллэр-көстөр тренер Глухарева Мария Руслановна. Кыыһым олимпиадаларга ситиһиилээхтик кыттар, үгүс хайҕал суруктардаах.

Гимназияҕа «Хомуур хабылык» диэн оҕо оонньуур сатабылын сайыннарар бэртээхэй бырайыактаахтар. Ол иһин кылаас оҕолоро бары сатыыллар. Миша быйыл эбии дьарыктанан, Дьокуускай куорат иһигэр ыытыллыбыт күрэххэ бэйэтин саастыылаахтарын ортотугар үһүс миэстэ буолбута. «Имигэс тарбахчаан» диэн анал аакка тиксэн, үөрэҕин ситиһиилээхтик түмүктээтэ. Уолум Иван Белолюбскай «Боотур» диэн бөлөҕөр сылдьар, многоборье дьарыгын наһаа сэргиир, — диэн Сардана Владимировна сэһэргээтэ.

Оонньуулар арыллыытын бочуоттаах ыалдьыта, туйгун үөрэнээччи Диана санаатын эмиэ эттэ:

“Ил Дархан ыҥырыытын тутан олуһун үөрбүтүм, долгуйбутум. Хайа оскуолаҕа үөрэнэҕин, хаһыс кылааскыный диэн ыйппыта. Өссө кини телефонугар уонна мин телефоммар хаартыскаҕа түспүппүт», —  диэтэ Диана.

Винокуровтар Ытык Таатта сиригэр күрэхтэһиилэргэ эрэ буолбакка, улуус култууратын, устуоруйатын билиһиннэрэр тэрээһиннэргэ хото сырыттылар.

Ол курдук, күн бэҕэһээ Хадаайы түмэлигэр Таатта Дьоруой уола Родимир Максимовка аналлаах быыстапка арыллыытын сэҥээрэн көрдүлэр.

Итини тэҥэ улуу суруйааччыларбыт Ойуунускай, Кулаковскай туһунан билиилэрин хаҥаттылар, араас тутуулары, култуура эбийиэктэрин билистилэр. Спорт Дыбарыаһыгар быыстапкаҕа сылдьан, улуус биллиилээх дьонун, спортсменнарын туһунан элбэҕи биллилэр.

«Ил Дархан, Саха Өрөспүүбүлүкэтин спорт министиэристибэтэ байыаннай дьайыы кыттыылаахтарын оҕолоругар болҕомтолорун уурбуттарыгар махталбыт улахан. Ытык ыалдьыт быһыытынан ыҥыран, түһэр сирбитин хааччыйан, историческай түгэҥҥэ кытыннарбыттарыгар ис сүрэхпититтэн махтанабыт!

Маны тэҥэ, «Модун» спорткомплекс салайааччыларыгар махталбыт муҥура суох. Кинилэр дьарыктыыр оҕолоругар наһаа кыһамньылаахтар, байыаннай дьайыы кыттыылаахтарын оҕолорун спортивнай форманан хааччыйыыга о.д.а. боппуруостарга ыкса үлэлэһэллэр.

Аҕабыт спортка сыһыаннааҕа, орто дистанцияҕа сүүрүүнэн, хайыһарынан дьарыктаммыта, спорду сэҥээрэр этэ. Кини быраата, Винокуров Иван, Спартакиадаҕа тохсус төгүлүн кыттан, улахан спортан сүүрэн бүттэ, ону бүгүн бэлиэтээтилэр», — диэн Сардана Евсеева кэпсээнин түмүктээтэ.

Хаартыскалар дьиэ кэргэн архыыбыттан

УлуусМедиа