Бэрдьигэстээх оҕолоро саҥа оскуолаҕа астына үөрэнэллэр

2023 сыл Горнайга биир улахан бэлиэ, умнуллубат сылынан дьон өйүгэр-санаатыгар иҥэн хаалла. Ол курдук, күүтүүлээх 550 миэстэлээх оскуола, оҕолор иннилэригэр аанын тэлэччи арыйбыта. Баараҕай объегы «СоюзИнвест» ХЭТ (дириэктэр Андрей Копырин) улуус салалтатын кытары хардарыта үбүлээһин быһыытынан үлэни толорбута, диэн «Үлэ күүһэ» хаһыат суруйар. 

Саҥа оскуола норуодунай поэт Семен Данилов аатын сүгэр. Билигин оҕолор бары өттүнэн толору хааччыллыылаах оскуолаҕа астына үөрэнэллэр. Ситиһиилэр да күүттэрбэтилэр. Бэрт кылгас кэм иһигэр Россия таһымыгар тиийэ көрдөрүүлэрэ таҕыстылар.

Оскуола кэлэктиибин, салалтатын туһунан төрөппүттэр биһиэхэ санааларын үллэстэллэр.

Семен Данилов аатынан оскуолата чахчы дьикти, аныгы! Эбийиэк бэйэтэ сырдык өҥнөрүнэн уонна ураты дизайн быһаарыыларынан улахан өйдөбүлү үөскэтэр. Киэҥ-куоҥ, сырдык кылаастардаах, киһи үтүөрүспэккэ, холкутук сылдьар көрүдүөрдээх, икки спортивнай саалалаах, бары өттүнэн толору хааччыллыылааҕа, оҕо-аймах үөрэ-көтө үөрэнэр оскуолата буолан, сандааран турар.

Хас биирдии кабинекка олоҕу кытары тэҥҥэ барсан иһэр оборудованиенан, интерактивнай панелларынан хааччыллыбыта, үөрэнээччилэр сайдалларыгар ураты кыаҕы биэрэр. Оскуолаҕа оннооҕор музей да баар! Оҕолор төрөөбүт дойдуларын историятын кыра эрдэхтэриттэн билэ улааталларыгар эмиэ биир ураты болҕомто ууруллубута кэрэхсэбиллээх.

Ордук учууталлар үлэлэрин бэлиэтиэхпин баҕарабын, оҕолор чахчы билиилэрин хаҥаталларыгар ис сүрэхтэриттэн үлэлииллэр! Оҕолорум эмиэ бу оскуолаҕа үөрэнэллэр. Ааспыт сылга кыыһым Анжелика бу оскуоланы бүтэрэн, билигин ХИФУ медицинскэй колледжыгар үөрэнэр. Уолум Ильдар VII кылаас үөрэнээччитэ. Учууталлар кыһамньыларынан НПК-ҕа кыттан, дойдубут хас да куоратыгар сырытта. Казаҥҥа Бүтүн Россиятааҕы “Кэлэр кэм оонньуулара” сылдьар дьолломмута. Кыыһым Арина V кылаас үөрэнээччитэ физкультура учууталларын салалтатынан спордунан көхтөөхтүк дьарыктанар. Бары учууталларга, оскуола салалтатыгар улахан махталбын тириэрдэбин. Үөрэнээччилэригэр ситиһиилэри баҕарабын уонна чэчирии, сайда туруҥ, – диэн Евгений Лаптев баҕа санаатын аныыр.

Розалия Аввакумова:

– 2023 сыллаахха оҕом баараҕай көстүүлээх, олох тэтимнээхтик, балысханннык сайдар кэмигэр сөп түбэһэр, бары ирдэбилгэ эппиэттиир норуодунай поэппыт Семен Данилов аатын сүгэр оскуола боруогун аанын арыйан киирбититтэн үөрэбин, киэн туттабын. Киһи эрэ үөрэниэх бары билиини биэрэр, төгүрүччү өйү-санааны, эти-сиини сайыннарар тутуулардааҕын киһи сөҕө көрөр.
Педагогтар оҕону, төрөппүтү кытары ыкса үлэлииллэрэ оҕо үөрэтиитигэр, иитиитигэр улахан кылаат буолар. Маннык үчүгэй көстүүлээх оскуола үрдүк билиини биэрэ турдун чулууттан-чулуулар улууспутун, Сахабыт сирин аатын ааттатар оҕолор үүнэн-сайдан таҕыстыннар диэн баҕа санаабын этэбин. Семен Данилов аатынан оскуола саҥа тыыннаммытынан хас биирдии учууталга, салайааччыга итии-истиҥ махталбын аныыбын.

Вячеслав Алексеев

УлуусМедиа