Муҥха Дэлбэрийбиккэ – кинигэ биһирэмэ
Тааттаҕа – Манчаары оонньуулара
Бу күннэргэ спорду сэҥээрэр Саха сирин олохтоохторун хараҕын дала – Таатта улууһугар туһаайыллар. Таатта улууһа духуобунас, айар тыл киининэн биллэр. Хас биирдии айар куттаах киһи сүрэҕэ-быара Былатыан Ойуунускай киинэ түспүт – Муҥха Дэлбэрийбит алааһа буолар. От ыйын 9 күнүгэр манна спорт салайааччыларын көрсүһүүтэ ыытылынна.
Сарсыардаттан алааска “Дьулуруйар Ньургун Боотур” уонна “Боотурдар көлүөнэлэрэ” көрсүһүү ыытылынна. Манна “Сахаада — спорт” уонна норуоттар икки ардыларынааҕы мас-рестлинг федерациятын бастакы вице-президенэ Александр Николаевич Ким-Кимэн буруолуу сылдьар “Дьулуруйар Ньургун Боотур уонна Боотурдар көлүөнэлэрэ” диэн кинигэтин биһирэмэ Былатыан Ойуунускай төрөөбүт балаҕаныгар ыытылынна.
Александр Николаевич бэлиэтээбитинэн:
“Саха государственноһын төрүттээччилэртэн биирдэстэрэ, уһулуччулаах киһи Былатыан Ойуунускай айан-тутан хаалларбыт сүдү үлэтэ, киһи-аймах кылаан чыпчаала буолбут “Дьулуруйар Ньургун Боотур” олоҥхо автора эрэ буолбатах этэ. Кини Саха сирин салайар кэмигэр физкультура хамсааһынын олоххо киллэрбит, хайысха биэрбит салайааччы буолар. Онон биһиги кинигэбитин “Дьулуруйар Ньургун Боотур уонна Боотурдар көлүөнэлэрэ” диэн ааттаатыбыт. Бу манна көлүөнэ солбуһуутун курдук: олоҥхо бухатыырыттан саҕалаан – Манчаары национальнай оонньуутугар тиийэ – Боотурдар көлүөнэлэрэ, солбуһуулара көстөр”, — диэтэ.
Кинигэ биһирэмигэр улууспут Аҕа баһылыга Айаал Бурцев, СӨ спорка уонна физическэй култуураҕа министрин бастакы солбуйааччы Гаврил Мохначевскай, Дмитрий Гуляев, спорт эйгэтигэр биллэр ааттаах-суоллаах спортсменнар кыттыыны ыллылар. Александр Николаевич мустубут дьоҥҥо туһаайан: “Өбүгэлэрбит оонньуулара сайда-чэчирии турдуннар, норуоппутун сайыннардыннар уонна аатыртардыннар диэн туран кинигэбитин анаан-минээн Былатыан Ойуунускай төрөөбүт балаҕаныгар аҕалан билиһиннэрдибит”, — диэн эттэ.
Тэрээһин кыттыылаахтара Былатыан үөрэммит оскуолатыгар уонна төрөөбүт сирэм күөх алааһыгар сайа тыынан, көрөн-истэн, күүс-уох ыллылар.
Александр Николаевич: “Биһиги саамай сүрүнэ бүгүн, бу ытык алааска “Дьулуруйар Ньургун Боотур уонна Боотурдар көлүөнэлэрэ кинигэбитинэн силбэһиини оҥордубут. Ол эбэтэр көлүөнэттэн көлүөнэҕэ биһиги улуу убайдарбыт ааттарын куруутун үрдүк таһымҥа тутан, кинилэр ааттарыгар сүгүрүйэн, эппит тылларын истэн уонна биһиэхэ биэрбит кэс тылларын толоро сылдьыахтаахпыт. Ол быһыытынан бүгүҥҥү төгүрүк остуолбут, кинигэ биһирэмэ олус таһымнаахтык ыытылынна”.
С.ХАЛГАЕВА.
Тэрээһин түгэннэриттэн хаартыскалар.