Таатта ыалдьыттара өссө биир сэргэх тэрээһиҥҥэ сырыттылар
Тааттаҕа – Манчаары XXII-c оонньуулара
Эн дьоллоох мындааҕар мин үөскээн үүммүтүм… Маннык ааттаах ахтыы-экскурсия Былатыан Ойуунускай күөх сирэм алааһыгар, күн сирин көрбүт дьоллоох мындаатыгар Муҥха Дэлбэрийбиккэ ыытылынна. Ахтыы-экскурсияны саха народнай суруйааччыта, П.А.Ойуунускай аатынан государственнай бириэмийэ лауреата, поэт-прозаик, сиэн балтыта Елена Слепцова-Куорсуннаах ыытта.
Эрдэттэн социальнай ситим нөҥүө биллэрии ыытыллан, төһө да ардахтаах күн үүннэр, дьон-сэргэ хото муһунна. Манна күөх Ньурбаттан, бүтэй Бүлүүттэн, чаҕылхай Махсыым дойдутуттан анаан-минээн кэлбиттэр.
Елена Васильевна аал уоту оттон, кэлбит дьоҥҥо анаан алгыстаах тылы этэн кэпсэтиини саҕалаата. Көрсүһүү олус истиҥ эйгэҕэ ыытылынна. Дьонун-сэргэтин туһунан уйан ахтыыны оҥордо, айар-тутар үлэтиттэн сырдатта.
Истээччилэрин ыйытыыларыгар толору эппиэттээн, кырдьык да уһулуччу киһи сыдьаанын тутан, атах тэпсэн олорон кэпсэтии астыныыны, киэн туттууну, умнуллубат дириҥ өйдөбүлү хаалларда.
Татыйык ыллыыр Таатта үрэх үрдүгэр турар музей-уһаайба өссө да үгүс ыалдьыттары күүтэр.
Светлана Халгаева
Хаартыскаҕа: Былатыан Ойуунускай төрөөбүт балаҕаныгар көрсүһүү түгэннэриттэн