Таатта ыалдьыттарыгар Ойуунускай успуорка кылаатын кэпсээтилэр
Тааттаҕа – Манчаары оонньуулара
Москваттан кэлбит успуорт эйгэтин үлэһиттэрин арыаллаан СӨ успуорка уонна физическэй култуураҕа миниистирэ Леонид Спиридонов Муҥха Дэлбэрийбит алааһыгар ыалдьыттаан, Былатыан Ойуунускай көмүлүөгүн сыралыгар тохтоон аастылар.
Манна “Былатыан Ойуунускайтан саҕалаан – успуорт инники кирбиитигэр” диэн быыстапканы көрдүлэр. Леонид Николаевич санаатын үллэһиннэ:
«Былатыан Ойуунускай 1924 сыллаахха ЯЦИК бэрэссэдээтэлинэн үлэлии олорон физкултуура норуокка тарҕанарыгар сүҥкэн үлэни оҥорбута. Оччолорго Николай Гущин диэн физкултуура хамсааһынын сайдыытын салайар киһи үлэлиирэ. Олохтоохтор ортолоругар успуорт көрүҥнэрин хайдах тэнитэбит диэн толкуйдаан баран, национальнай көрүҥнэринэн угуйуохха сөп эбит диэн биир санааҕа кэлэллэр, быһаарыы ылыналлар. Улахан үлэ саҕаланар. Былатыан Ойуунускай спартакиаданы ыытыыга уураах таһаарар.Онон национальнай көрүҥнэргэ быраабылалары оҥорорго сорудахтаан, ол суруллан, бигэргэтиллэр. Биһиги национальнай көрүҥнэрбит сайдалларыгар улахан үлэни тэрийбитэ.
Мин Муҥха Дэлбэрийбит алааһыгар хаста да кэлэ сылдьыбытым. Бу алаас киһи кутун-сүрүн иһинэн киирэр, олус чэпчэки тыыннаах үтүө сир. Манна кэллэҕим аайы күүс-уох ылан барабын. Саха дьоно-сэргэтэ манна элбэхтик кэлэн сылдьыахтарын наада. Биһиги министиэристибэбит судаарыстыбаннас музейыгар успуорт эйгэтин сайдыытыгар Былатыан Ойуунускай киллэрбит суолун-ииһин көрдөрөн стендэ оҥорон бэлэхтээтибит.
Светлана Халгаева
Өссө ааҕыҥ: Василий Егоров: «Маннык тэрээһиҥҥэ сылдьыбыппыттан олус астынным» Игры МанчаарыПлатон ОйунскийТаттинский район