От үлэтэ: быйыл Амма улууһуттан уратыларга бытаарыы таҕыста

Тыа хаһаайыстыбатын иһитиннэриинэн-ырытыынан хааччыйар биир кэлим тиһиккэ улуустардааҕы тыа хаһаайыстыбатын салалталара биэрбит дааннайдарынан, от ыйын 10 күнүнээҕи туругунан, 528 гектар иэннээх сир охсулунна, 109 туонна от кэбиһилиннэ.

Бу кэмҥэ ходуһаҕа 417 киһи 137 звенонан оттуу сылдьар. Звенолартан 28 – толору мэхэньисээссийэлээх, 73 – ситэтэ суох сэбилэниилээх, 6 көлө-илии уонна 30 хары күүһүнэн оттууллар. Билиҥҥитэ 131 тыраахтар тахсыбыт.

Улуустартан бастакынан Амма отчуттара күүскэ туруннулар: 78 туонна кэбиһиилээхтэр, 324 гектар охсуулаахтар, 185 киһи 76 тыраахтар күүһүн туһанан, 62 звенонан (ол иһиттэн уона – толору, 52-тэ ситэтэ суох сэбилэниилээхтэр) үлэлиир. Иккискэ 75 отчуттаах сунтаардар иһэллэр: 16,7 туонна кэбиһиилээхтэр, 62,5 гектар охсуулаахтар. Мэҥэ Хаҥалас улууһугар 20 отчут 10 тыраахтары көлүнэн үлэлии сылдьар. Билиҥҥитэ 90 гектарга охсуулаахтар эрээри, кэбиһэ иликтэр. Ити кэмҥэ хоту Үөһээ Халымаҕа 8, соҕуруу Ленскэйгэ 6 туонналыы оту туруорбуттар.

Быйыл от тахсыыта хойутаан, бытаарыы тахсыбыта илэ-чахчы. Былырыын баччаҕа, кураан сайын диэтэххэ, 397 туонна от турбута. Ол таһым үстэн биирин кыайбат (27%) кээмэй оттонон иһэрэ дьиксиннэрбэт буолуон табыллыбат. Билиҥҥи туругунан, 4 эрэ улуус кэбиһиилэннэ, 8 улуус охсууланна. Арай, аммалар былырыыҥҥыларын куоһаран (422%) иһэллэрэ атын олус наҕыл-холку улуустарга холобур буолуох тустаах.

Өссө төгүл санаттахха, быйыл өрөспүүбүлүкэ үрдүнэн 434 334 туонна от бэлэмнэниллэрэ былааннанар. Улуустар уонна куораттардааҕы уокуруктар бу кээмэйтэн 92 бырыһыанын, ол эбэтэр 400,5 тыһ. туоннатын ыларга суоттаналлар. Мантан сайын-күһүн күн-дьыл хайдах хараҕынан көрүө, тугу тосхойуо биллибэт. Онон бэйэ күүһүгэр, сатабылыгар эрэ эрэнэн туран, ходуһаҕа күргүөмүнэн киириэххэ.

Василий Никифоров

Екатерина Гладкина хаартыскаҕа түһэриитэ

УлуусМедиа