Бөтүрүөп куйааһын күүтүмэҥ, халлааммыт ыйы быһа күн көтө-көтө ардыыра сабаҕаланар
От ыйын 12 күнэ – былыргы саха олоҕор-дьаһаҕар Бөтүрүөп диэн аатынан биллэр биир бэлиэ күн этэ. От ситэн, оттуу киирэллэрэ. Бөтүрүөптэн өҥүрүк куйаас саҕаланар. Бөтүрүөпкэ ардаатаҕына, бурдук, отон, тэллэй дэлэйдик үүнэр.
Аны сарсыныгар, от ыйын 13 күнүгэр, “абааһы мунньаҕынан” аатырар Кунай хотуурдаах күнэ. Бу күн абааһылар мунньахтыыллар диэн от охсон, хадьымал таһаарартан туттуналлара. Өбүгэлэрбит итэҕэллэринэн, абааһылар мустан мунньахтыыр күннэригэр хотуур суолун таһаардахха, абааһы буулуур.
Ол иһин былыр сахалар ходуһаларыгар абааһы мунньаҕын иннинэ киирэн, хотуур суолун түһэрэ сатыыллара. Абааһыны-иччини билиммэт сэбиэскэй былаас сылларыгар сопхуостар отчуттара ыһыахтаан баран, тута от ыйыттан хотуурдарын ыллаппытынан бараллара.
Тыа хаһаайыстыбатыгар эргиччи табыллыбыт, тупсаҕай дьыл диэн суох. Быйыл сааспыт-сайыммыт тымныытынан туругурда. Аны ытанньах оҕолуу куурдубат, ардаҕынан баппат чинчилээх. Мантан сайын от үлэтэ үгэннээн турар кэмигэр халлааммыт хайдах буолуой диэн ыйытыыга хоруй көрдөөн, Gismeteo биир ыйдааҕыны билгэлээбитинэн сирдэттэххэ, киин, илин эҥээрдээҕи, Бүлүү умнаһынааҕы уонна хотулартан соҕотоҕун үүккэ үлэлиир Үөһээ Дьааҥы улууһугар ханан даҕаны иккилии-үстүү күн арыттаах ардах ыйы быһа араҕыа суоҕа.
Быйыл Бөтүрүөп куйааһын күүтүмэҥ. Дьокуускайга уонна киин улуустарга от ыйын 12 уонна 22 күннэригэр +26, Бүлүү сүнньүгэр Бөтүрүөпкэ эрэ +27 кыраадыска тиийэ итийэрэ күүтүллэр. Илин эҥээргэ от ыйын от ыйын 16-17 күннэригэр муҥутаан 25 кыраадыска диэри куйаара сылдьыа. Дьааҥыга от ыйын 17 уонна 18 күннэригэр салгын 26-тан 27-ҕэ диэри итийиэҕэ.
Василий Никифоров
Хаартыска: Ньургуйаана Климовская, «Олох суола» хаһыат, Бүлүү
Погода