Манчаары Баһылай аата аатыра, албана турдун!
От ыйын 10 күнүгэр XXII-с Манчаары оонньууларын чэрчитинэн Д.К. Сивцев-Суорун Омоллоон аатынан Чөркөөх музейыгар «Манчаары – уос номоҕор, уус-уран литератураҕа уонна наукаҕа» диэн сонун Мэтириэт киэһэтэ ыытылынна.
Норуот номоҕор киирбит Баһылай Манчаары уобараһын кимнээх уус-уран литератураҕа арыйбыттарын, кимнээх Манчаары олорбут уонна охсуспут кэмин үөрэппиттэрин туһунан бу күн ыраахтан-чугастан мустубут дьон элбэҕи билэн-көрөн тарҕастылар.
Чөркөөх музейын дьиэлэригэр-уоттарыгар В.В Никифоров–Күлүмнүүр, А.И.Софронов-Алампа айымньыларынан П.В. Толстяков аатынан Чөркөөхтөөҕү норуот театрын артыыстарын толоруутугар «Манчаары» испэктээктэри көрөн сөхтүлэр.
Бу киэһэ Тааттатааҕы Николаевскай таҥара дьиэтин хоту истиэнэтигэр 1928 сыллаахха Чөркөөххө ыһыах кэмигэр Былатыан Ойуунускай курдук көрөөччүлэрдээх А.И. Софронов «Манчаары» айымньытынан испиэктээҕи эргитэн билиҥҥи көлүөнэ артыыстар оонньоон толорбуттара кэрэхсэбиллээх тэрээһин чопчутунан буолла.
Кэнэҕэс да кэмнэргэ кэнчээри ыччаппыт кэскилигэр Манчаары Баһылай аата аатыра, албана турдун.
Изабелла Жерготова, Таатта, Чөркөөх,
Сардаана Аввакумова хаартыскалара
Игры Манчаары