Чурапчылар байыаннай дьайыы кыттыылаахтарыгар таҥас тигиитин куонкуруһугар кытталлар

От ыйын 12 күнүттэн саҕалаан Дьокуускай куорат “Кыайыы 50 сыла” успуорт дыбарыаһыгар “Стежок за стежком, метр за метром” байыаннай дьайыы кыттыылаахтарыгар анаан таҥас тигэр иистэнньэҥнэр куонкурустара бүгүн түмүктэнэр чааһа үүннэ, диэн «Саҥа олох» хаһыат суруйар. 

Куонкуруһу “Илии сылааһа” дьахталлар добровольческай иистэнэр сыахтара бэһис сылын көҕүлээн ыытар. Күрэхтэһиигэ 11 улуустан сүүстэн тахса иистэнньэҥ кытта сылдьар, ол иһигэр биһиги Чурапчыбыт улууһун уран тарбахтаахтара эмиэ иистэннилэр.

Төһө даҕаны бачча быыһык от-мас, сир, оҕуруот аһа үгэннээн турар кэмигэр Чурапчы дьахталлара дьиэни-уоту, оҕону-урууну хаалларан, сылайары аахсыбакка, хамаанда тэринэн олус үчүгэйдик күрэхтэһэ сылдьаллар.

“Чурапчы улууһуттан уон киһилээх тэринэн кэлэммит үс күн устата иистэннибит. Алта устуука, 19 предметтээх “Эр хоһуун” кэмпилиэги тиктибит, ону таһынан икки адаптивнай, 11 предметтээх кэмпилиэк баар. Инньэ гынан бу үс күн устата 136 таҥаһы, итини сэргэ икки нательнай көстүүмү уонна икки сэлээппэни оҥорон таһаардыбыт.

Күүстээх үлэ буолла, сарсыарда 8 чаастан киэһэ 21 чааска диэри лигиччи олорон эрэ иистэннибит. Бүгүн бүтэһик күммүт, хамыыһыйа туох баар таҥастары барытын сыныйа көрөннөр бэрэбиэркэлиэхтээхтэр. Эбиэттэн киэһэ хас биирдии хамаандаттан 5-тии киһи састааптаах остуол оонньуутугар күрэхтэһии буолуохтаах уонна киэһэ 18 чааска кыайыылаахтары ааттыыллар”, — диэн Чурапчы улууһуттан иистэнньэҥнэр хамаандаларын хапытаана, норуот маастара Надежда Ахматова кэпсээтэ.

Киһи маннык дьаһанан тиийэн күрэхтэһэ сылдьалларын хайҕыан эрэ сөп. Маннык күрэхтэһиигэ элбэх таҥас бэлэмнэнэн, барыта бэйэбит байыастарбытыгар барар. Чурапчы дьахталлара көрөн, туора турбаккалар эрэ бу үтүө дьыалаҕа кыттыһаллара сылтан-сыл аайы үксээн иһэр. Иистэнньэҥнэр маладьыастар. Чахчы даҕаны киһи сөҕө көрөр, хайгыыр дьоно. Бу куонкуруска миэстэлэһии, биһиги саныахпытыгар, улахан оруолу оонньообот. Барыта Кыайыы туһугар буоллаҕа!

 Сэмэн ЖЕНДРИНСКЭЙ

УлуусМедиа