Саҥа түөлбэҕэ “Сунтарцеолит” тэрилтэ үлэһиттэрэ биир бастакынан олохсуйуохтара

Сунтаар нэһилиэгэр “Өтөөкү”,  “100 лет ЯАССР” саҥа түөлбэлэргэ “Сунтарцеолит” ХЭТ  тыа сирин биир кэлимник сайыннарыы тосхолунан үлэһиттэригэр анаан таас дьиэлэри тута сылдьар. Уопсайа бу тосхолунан 6 дьиэни тутар соруктаахтар.  Бүгүҥҥү күн туругунан 4 дьиэни дьэндэтэн, тутууларын 50 % толордулар, «Сунтаар сонуннара» хаһыат суруйар.

Этиэххэ наада, бу тутууларыгар “Сунтарцеолит” бэйэтэ оҥорон таһаарар тутуу матырыйалын туһаннылар. Ол курдук, Сунтаар улууһугар хостонор цеолиты үрдүк температураҕа үлүннэрэн пеноцеолит диэн тутуу блоктарын оҥорон, дьиэ тас истиэнэтин оҥордулар.

Бу саҥа тутуу матырыйаалын атын тутууларга эмиэ туһаммыттара биллэр. Саха сирин тыйыс кыһынын тургутуутун ааспыт пеноцеолит сылааһы тутар хаачыстыбата үрдүгүнэн дьон биһирэбилин ылбыта.

“Сунтарцеолит” ХЭТ дириэктэри экономикаҕа уонна сайдыыга солбуйааччы  Константин Семенов иһитиннэрэринэн: “Үлэһит дьоммутун олорор дьиэнэн хааччыйыы диэн саҥа бырайыакпыт буолар. Бу бырагыраамабытынан кытаанах, күүстээх үлэҕэ эриллэ сылдьар дьоммутун дьиэнэн хааччыйыахпыт. Ол курдук, тэрилтэ механига, улахан уйуктаах массыына суоппардара, тырахтарыыс саҥа дьиэ күлүүһүн тутуохтара. Сүрүн ирдэбилбитинэн саҥа дьиэлэммит үлэһиттэрбит тэрилтэҕэ 5 сылтан ордук үлэлиэхтээхтэр диэн. Тутууну “Сунтарцеолит” иһинэн үлэлиир “Сунтарэнерго” тэрилтэ ыыта сылдьар”.

Бырагыраама ирдэбилинэн тутуу 30%  үбүлээһинин тэрилтэ бэйэтэ уйунар, онтон атына федеральнай тосхолунан барар. Онон тутуу тэтимнээхтик барар.

Билигин саҥа “Өтөөкү” түөлбэҕэ уота тардыллан турар, суола бу сайын оҥоһуллуохтаах. Икки хаалбыт дьиэ “Өтөөкү” түөлбэ иккис этабыгар киирэн турар. Саҥа дьиэлэр малааһыннарын алтынньы ыйга күүтэллэр.

Мира АФАНАСЬЕВА

УлуусМедиа