Ытык-Күөлгэ «Бадараан-шоу» үгүс сүгүрүйээччилэрин муста

Ытык-Күөлгэ 11-c төгүлүн «Бадараан шоу» ыытылынна. Сахабыт сирин ыарахан суолларынан уһаты-туора сүүрдэ үөрүйэх, ханнык да ыарахаттартан толлон турбат, күөллэринэн, маардарынан, бадарааннарынан сыыйылыннары сүүрдэр тостубат майгылаах Сахабыт сирин томороон суоппардара Ытык-Күөл Саһыл Уйалаах  сиригэр мустан илин-кэлин түһүстүлэр, диэн «Таатта» хаһыат суруйар. 

Быйылгы күрэххэ көрөөччү ахсаана хаһааҥҥытааҕар да элбэх буолла. Кыратыттан улаханыгар тиийэ дьон хото муһунна, атыы-тутуу ыһыахтан итэҕэһэ суох дэлэччи тардылынна.

Быйылгы күрэскэ Намтан, Дьокуускайтан, Чурапчыттан, Мэҥэ-Хаҥаластан, Уус-Алдантан, Сунтаартан, Тааттаттан барыта 7 улуустан 18 инжектор, 19 карбюратор массыыналар кыттыыны ыллылар. Быйылгы күрэххэ бастакытын кыттар дебютаннар элбэхтэр диэн судьуйалар бэлиэтээтилэр.

Кэрэ аҥаардар уонна эр дьон бадараанынан сүүрүүлэрин күрэҕэ бэрт күүрүүлээхтик ааста. Түмүккэ кыргыттарга Ытык-Күөлтэн Валерия Румянцева, дьахталларга Дэбдиргэ кийиитэ, Манчаары оонньууларыгар хотугу многоборьеҕа сүгэни ыраах быраҕыыга саҥа рекорду олохтообут Антонина Санникова, уолаттарга Дэбдиргэттэн Айсен Варламов,  эр дьоҥҥо Мэҥэ-Хаҥаластан Василий Тарабукин биэтэккэ бастакынан кэлэннэр уу харчынан, кубогынан уонна грамоталарынан  наҕараадаланнылар .

Томпо улууһун Мэҥэ-Алданыттан Татьяна Попова:

— Бадараан шоуну көрөөрү анаан минээн Манчаары оонньуутун кэнниттэн көрө хааллыбыт. Олус улахан таһымнаах, «зрелищнэй» күрэхтэһии баар эбит диэн астына көрдүбүт. Мин бэйэм гиревой спордунан дьарыктанабын. Манна бадараанынан сүүрүүгэ кыттаммын 3-с миэстэ буоллум.

Сардана Сидорова,  Саһыл орто оскуолатын иитэр үлэҕэ директоры солбуйааччы:

— “Манчаары оонньуутугар” дойдубут дьонугар ыалдьа 5 күн тигинэччи сырыттыбыт. Эрдэ кэлэ-бара Тааттаҕа кэлэн ааһар этибит. “Манчаары оонньууларын” көрсө Таатта улууһа улаханнык сайдыбыт. Таатталар күрэхтэһиини ымпыгар тиийэ хоннохтоохтук бэлэмнэнэн, кэлбит ыалдьыттары маанылаан көрүстүлэр, араас  тэрээһиннэр быысталы булбакка тигинэччи буоллулар, манна барытыгар кыттан, илэ харахпытынан көрөн астынныбыт. Томпо улууһугар араас омуктар олорор буоланнар тэрээһиннэрбит барыта нууччалыы тылынан ыытыллаллар. Сахалыы тылы дэҥҥэ истэбит. Таатта улууһа сахалыы тыынын тута олорорун сөҕө уонна биһирии көрдүбүт. Таатталар “Бадараан шоу” диэн эмиэ улахан таһымнаах күрэхтэһиини тэрийэн ыыталлар. Ыһыах курдук элбэх киһи мустар, атыы-тутуу тэриллэр, араас улуустартан кыттааччылар кэлэллэр эбит.

Кыттааччылар сыл устата бэлэмнэнэн, массыыналарын кыаҕын улаатыннаран, көрүнэн-истинэн, ох курдук оҥостон кэлэллэр. Көлүөһэлэрин сабар бадарааннаах, суола-ииһэ суох адьарай сиринэн массыыналарын кыаҕын таһынан сүүрдэн ааһаллар. Аанын ортотугар дылы бадарааҥҥа батыллан турар массыыналарын тыраахтардар, каракаттар тута сүүрдэн кэлэннэр хостоон таһаараллар. Абсолютнай күрэххэ массыыналар бадарааннааҕын ааһан уһун усталаах күөлү ортотунан сүүрдэн ким чахчы кыахтааҕын быһаарсаллар.

Массыыналар түлэй түүнү аахсыбакка, бүрүүкээбит чуумпуну хайа тардан үс туман түһүөр дылы сырыстылар. Уопсай түмүккэ барыларын куоһаран муҥутуур кыайыылааҕынан инжектордарга Тааттаттан «Гризли» хамаандата (Турнин Петр), карбюратордарга Тааттаттан «Ягуар» (Новгородов Василий, Можаров Егор) таҕыстылар.  Кыайыылаахтар сыаналаах  бириистэринэн, грамоталарынан, кубоктарынан  наҕараадаланнылар.

Анна Яковлева суруйуута уонна хаартыскалара,  В.Власова видеота

УлуусМедиа