Оттооһун хаамыыта: тэтимирдэ эрээри, былырыыҥҥыттан бытаан

Тыа хаһаайыстыбатын хааччыйар биир кэлим иһитиннэрэр-ырытар тиһиккэ улуустардааҕы тыа хаһаайыстыбатын салалталара киллэрбит сибидиэнньэлэринэн, от ыйын 24 күнүнээҕи туругунан, бүттүүн былааннаммыт 434 334 туонна оттон 8 бырыһыана (33 613,8 туонна) кэбиһилиннэ. Нэдиэлэ анараа өттүнээҕи 1 бырыһыаҥҥа холоотоххо, от үлэтэ балачча тэтимирдэ эрээри, былырыын баччаҕа оттоммут кээмэйгэ 20 бырыһыанынан тиийбэт.

Саха сирин ходуһаларыгар отчуоттанар кэмҥэ 12 425 отчут таҕыста. Ити иһигэр 1 548 толору мэхэньисээссийэлээх уонна 1 773 ситэтэ суох сэбилэниилээх звенолар 5 818 араас кыамталаах тыраахтар күүһүн көлүнэн үлэлииллэр. Урукку сыллары кытта тэҥнээн, дьиҥ баар кыахтан билиҥҥитэ үлэһит илии даҕаны, тиэхиньикэ даҕаны аҥаардыыта эрэ туһаныллар диэн сабаҕалыыбыт.

Сүрүннээн, кыра былааннаах хотугу улуустарга – Аллайыахаҕа, Булуҥҥа, Эдьигээҥҥэ, Аллараа Халымаҕа, Усуйаанаҕа, Өлөөҥҥө, Эбээн Бытантайга салаа от охсулла, ахсаан саҕалана илик курдук көстөр эрээри, сайын баччатыгар диэри сүөһүлээх-сылгылаах ыаллар хотууру тыаһаппыт буолуохтарын, миэстэттэн сибидиэнньэни хомуйуу бытаарар буолуон сөп. Холобур, Булуҥ улууһугар соҕотох отчут нэһилиэккэ, Бороҕоҥҥо, кураан-куйаас күннэр тураннар, бэлиэр, сорохтор кэбиспиттэрин, сорохтор кэбиһэн эрэллэрин туһунан быйыл уонча туонна оту туруоруохтаах Петр Николаевич Бурцевтыын кэпсэтэн биллим.

Ардах халааныгар ылларбыт Өймөкөөҥҥө от үлэтигэр туруна иликтэрэ өйдөнөр. Муомаҕа 23,3 гектар охсуулаах, 9,4 туонна кэбиһиилээх былааннарыттан 1 бырыһыанын кээрэттилэр. Обургу былааннаах улуустартан Үөһээ Дьааҥыга, Тааттаҕа эмиэ 1-дии, Чурапчыга 2 бырыһыан оттоннулар. Сайын баччатааҕы ардах, киһи сымыйаргыан курдук, дьээбэтэ-хообото элбэх. Бэргэһэ саҕа даҕаны былыт алдьатыыта улахан буолар. Бөлүүн Чурапчыга Одьулуун, Хайахсыт нэһилиэктэрин силлиэлээх, тобурахтаах ардах аймаан ааспыт.

Былааннаммыт кээмэйтэн өрөспүүбүлүкэ орто көрдөрүүтүн (8 бырыһыаны) аһара толорон иһэр 9 улууһу уонна “Сатай” куораттааҕы уокуругу бастыҥнарынан ааҕан, оттооһун хаамыытын билиһиннэрэбит (табылыыссаҕа көр). Түгэнинэн туһанан, нэһилиэктэргэ, учаастактарга оттоммут дааннайдары миэстэттэн суһаллык хомуйан, биэрэн истэххитинэ биирдэ оттооһун дьиҥнээх туруга көстүөҕүн уонна онон сирдэтэн, чопчу сыанабыл оҥоһуллуон өссө төгүл тоһоҕолоон санатабыт.

Василий НИКИФОРОВ

УлуусМедиа