Муҥутуур кыайыылаах ыанньыксыт Татьяна Десяткина өрөспүүбүлүкэ аатыттан дойду күөн күрэһигэр кыттыаҕа
Саха сирин массыынанан ыаһын оператордарын 25-с төгүлүн ыытыллар күөн күрэстэрэ өрөспүүбүлүкэ рекордсмен-ыанньыксыта Павел Шарин 70 сааһыгар ананан Мэҥэ Хаҥалас улууһун Төхтүр нэһилиэгэр Моҕоллой сайылыкка түһүлгэлэннэ. Барыта 9 улуустан уонна Дьокуускай куораттан 32 ыанньыксыт кэлэн күрэхтэстэ.
Кинилэр ортолоругар 12 эр киһи оператор баара кэрэхсэбиллээх. Павел Петрович бу эрчимнээх илиилээх уолаттары көрө олорон, эдэр сааһын санаабыта эрэбил, “Сайылык – өлгөм үүт, эмис эт” диэн аалай кыһыл таҥаска үрүҥ кыраасканан суруллубут луоһун хараҕар элэҥнээн ааһарга дылы. Үөрүөн иһин, Моҕоллойго ынахтар бүгүҥҥэ диэри маҥыраһаллар уонна кини сопхуостар муҥутаан сайдыбыт сылларыгар үрдүк үүт ыамын иһин күрэстэспит биир идэлээхтэрэ, Арассыыйа Үлэтин дьоруойдара Михаил Готовцев Уус Алдантан уонна Владимир Михайлов ыраах Сунтаартан айаннаан кэлэннэр, үөлээннээхтэрин олоҕун бэлиэ кэрдииһинэн эҕэрдэлээтилэр. Киһи сөҕөрө баар, Михаил Николаевич 80 сааһыгар сырыттар даҕаны, Тандаҕа “Удьуор” бааһынай хаһаайыстыбатын баһылаан-көһүлээн үлэлэтэрин ыһыкта илик, оттон аны күһүн 72-тин туолуохтаах Владимир Африканович “Кириэстээх” кэпэрэтиип бастыҥ ыанньыксыта буолар аатын-суолун тута сылдьар. Дьэ, эдэрдэргэ чахчы тыыннаах холобуру көрдөрө сылдьар дьоһун дьон.
Тыа хаһаайыстыбатын уонна ас-үөл бэлиитикэтин министиэристибэтин сүөһүнү иитиигэ, племенной үлэҕэ департаменын сүрүн исписэлииһэ, күөн күрэс дьүүллүүр сүбэтин чилиэнэ Александра Петрова билиһиннэрэринэн, куонкурус кыттааччыларыгар анаан Моҕоллой сайылыкка турар бааһынай хаһаайыстыбалаах Андрей Холмогоров 60-ча ынаҕыттан 40-ун талан бэлэмнээбиттэр. Андрей Лукич 120-чэ сүөһүлээх орто бааһынайга киирсэр эбит. “Уруккулартан уратыта диэн, быйыл түмүгү хамаанданан буолбакка, Арассыыйа таһымыгар ыытыллар куонкурус курдук, биирдиилээн бастыыр иһин баал систиэмэтинэн таһаардыбыт. Итиэннэ кыттааччыларга эдэр уолаттар элбэхтэр”, – диэн бэлиэтиир Александра Петровна.
Икки күннээх тургутуу кэнниттэн кыайыылаахтары быһаарар түмүк таҕыста. Ол курдук, 45-гэр диэри саастаах эдэр ыанньыксыттарга Бүлүү улууһун “Бөтүҥ” ТХПК-ин оператора Василий Дмитриев бастаата, Сунтаартан “Кириэстээх” ТХПК оператора Валерий Генеров иккис, Хаҥалас улууһуттан “Туймаада” эко-пиэримэ оператора Мария Саввина үһүс миэстэлэри ыллылар. Кыайыылаах “REGULMOTO” матасыыкылы, миэстэлэспиттэр мопеды уонна бэлэсипиэти сүүрдэн бардылар. Иккис бөлөххө – 45-тэн аҕа саастаахтарга “Хорообут” хаһаайыстыбаттан (Мэҥэ Хаҥалас) Мария Чугунова бастакы, “Бөртө” сылгы собуота” хаһаайыстыбаттан (Хаҥалас) Николай Потапов иккис, “Бөтүҥ” ТХПК-тэн (Амма) Мария Никитина үһүс миэстэлэргэ таҕыстылар. Бастаабыт трицикл, миэстэлэспит кыттааччылар холодильник, тоҥорор ларь курдук сыаналаах бириистэри туттулар.
Миэстэлэри таһынан муҥутуур кыайыылааҕы быһаардылар. Барыларыттан үрдүк көрдөрүүлээх (98,5 баал) Мэҥэ Хаҥалас “Тумул” ТХПК массыынанан ыаһыҥҥа оператора Татьяна Десяткина муҥутуур кыайыылааҕынан ааттанна. Кини атырдьах ыйын 26-29 күннэригэр Владимир уобалаһыгар ыытыллыахтаах Бүтүн Арассыыйатааҕы күөн күрэскэ Саха сирин аатыттан кыттар быраабы ылла. Тыа хаһаайыстыбатын уонна ас-үөл бэлиитикэтин миниистирин бастакы солбуйааччыта Анна Стручкова наҕараадалары туттарар түгэҥҥэ: “Маннык күөн күрэс идэни баһылааһыны тургутар эрэ буолбатах, сүөсүһүт ыарахан үлэтигэр сүгүрүйэрбитин, ынньыксыт аатын үрдүктүк тутарбытын туоһулуур. Татьяна дойду түһүлгэтигэр Сахатын сирин ааттатыаҕар эрэнэбит”, – диэтэ.
Быйылгы күөн күрэһи ыытарга Нөмүгүтээҕи килиэп астыыр собуот (В.А. Нестеров), “Туймаада” агрохолдинг (П.С. Ефремов), бааһынай хаһаайыстыбалар баһылыктара Ньургун Габышев (Мэҥэ Хаҥалас) уонна Арыйаан Винокуров (Нам). “Тумул” ТХПК (Т.В. Десяткина) уонна “Алаас-Ас” (С.Г. Шестакова) үбүнэн-харчынан көмөлөспүттэригэр тэрийээччилэр истиҥник махтаналлар.
Василий НИКИФОРОВ
Хаартыскалары Тыа хаһаайыстыбатын министиэристибэтин пресс-сулууспата биэрдэ
АвторыСельское хозяйство