Оттооһун хаамыыта: бүттүүн былааннаммыт кээмэйгэ 40 тыһ. тахса туонна от тиийбэт чинчилээх
От ыйа баранна. Тыа хаһаайыстыбатын хааччыйар биир кэлим иһитиннэрэр-ырытар тиһиккэ улуустардааҕы тыа хаһаайыстыбатын салалталара киллэрбит сибидиэнньэлэринэн, от ыйын 31 күнүнээҕи туругунан, бүттүүн былааннаммыт 434 334 туонна оттон 18 бырыһыана (80 163,7 туонна) кэбиһилиннэ.
Нэдиэлэ анараа өттүгэр диэри өрөспүүбүлүкэ үрдүнэн 400 049 туонна от (былааннаммыт кээмэйтэн 92 бырыһыана) чөкөтүллүөхтээҕэ сабаҕаламмыт эбит буоллаҕына, бу сырыыга 91 бырыһыаҥҥа диэри таҥнары түстэ, ол эбэтэр 5 830 туонна отунан татымсыйда. Ленскэй, Орто Халыма, Томпо хас биирдиилэрин сүөһүтэ-сылгыта дьыл туоруохтаах аһыгар тэҥнэһэр сыыппара. Оттон бүттүүн былааннаммыт таһымҥа 40 тыһ. тахса туонна от тиийбэт. Маны ыйааһыҥҥа уурдахха, Мэҥэ Хаҥалас курдук улахан тыа хаһаайыстыбалаах улуус кыстыгы туоруохтаах отун кытта утаа-сабаа.
От ыйын 24 күнүнээҕи туругунан, 10 улуус сүүс бырыһыан уонна “Сатай” куораттааҕы уокурук 114% оттонорго суоттаналларыттан билигин сатайдары кытта 8 улуус былаанын толорорго эрэллээх. Абый (95%), Уус Маайа (51%) туораатылар уонна Үөһээ Дьааҥы, Өймөкөөн, Бүлүү, Аллараа Халыма, Эбээн Бытантай былааннаах отторун кээмэйин намтаттылар. Ол төрүөтэ, биллэн турар, арахпакка түһэр ардах уута-хаара. Холобур, ардах халааныгар ылларбыт өймөкөөттөр 3 660 туонна былааннарыттан 1 488-ын, эбэтэр 41 бырыһыанын бэлэмнииргэ дьулуһаллар. Сабаҕалааһыннарын нэдиэлэ иһигэр 25 % түһэрдилэр. Ити кэбиһиллибит от ыйааһыныгар таһаардахха, 930 туонна. Бүлүү улууһугар намтааһын өссө баһырхай: ааспыкка 94% сабаҕалаан олорбут буоллахтарына, билиҥҥилэрэ – 84%. Сыччах ити арыттаһыыта – 2 321 туонна от, бастааҥы былааннаммыт кээмэйтэн бүлүүлэр онон 3 709 туонна от чычырбастаныахтара.
Саха сирин ходуһаларыгар отчуоттанар кэмҥэ 20 974 отчут таҕыста. Ити иһигэр 2 804 толору мэхэньисээссийэлээх уонна 3 300 ситэтэ суох сэбилэниилээх звенолар 9 460 араас кыамталаах тыраахтар күүһүн көлүнэн үлэлииллэр. От ыйа бүтүөр диэри окко былааннаах хотугу улуустартан Аллайыахаҕа, Булуҥҥа, Эдьигээҥҥэ, Аллараа Халымаҕа, Усуйаанаҕа, Өлөөҥҥө, Эбээн Бытантайга салаа от охсулла, ахсаан саҕалана илик. Ол гынан баран, министиэристибэ туһааннаах исписэлиистэрэ быһааралларынан, хоту интэриниэт сибээһэ мөлтөҕүттэн эбэтэр сорох сиргэ тыа хаһаайыстыбатын исписэлиистэрэ көһүүннүк үлэлиир буоланнар, сибидиэнньэ киллэрбэккэ олороллор.
Ааспыт сырыыга курдук, улахан-кыра былааннаах диэн араарбакка, былааннаммыт кээмэйдэриттэн өрөспүүбүлүкэ орто көрдөрүүтүн (18 бырыһыаны) куоһаран иһэр 9 улууһу уонна “Сатай” куораттааҕы уокуругу бастыҥнарынан ааҕан, оттооһун хаамыытын билиһиннэрэбит (табылыыссаҕа көр). Хас нэһилиэк, учаастак аайы дьон хара көлөһүнүнэн оттообут дааннайдарын миэстэттэн суһаллык хомуйан, биэрэн истэххитинэ биирдэ оттооһун дьиҥнээх хартыыната көстүөҕүн сирэй эбээһинэстээх исписэлиистэргэ өссө төгүл тоһоҕолоон санатабыт.
Оту сэргэ билиҥҥитэ Хаҥалас улууһугар эрэ сиилэстээһиҥҥэ киирдилэр. Бу улуус 3 тыһ. туонна сиилэс былааннааҕыттан 600 туоннатын уган, толоруута 20 бырыһыаҥҥа тэҥнэстэ. Инньэ гынан, өрөспүүбүлүкэ үрдүнэн 24 184 туонна сиилэс угуллара былааннаммытыттан 2 бырыһыана туолан иһэр.
Василий НИКИФОРОВ
АвторыСельское хозяйствосенокос