Оҕуруот аһын хаһаанабыт: томат соустаах оҕурсу
«Эҥсиэли» хаһыат аныгы, интэриэһинэй, минньигэс салаат ырысыабын ааҕааччылары кытта үллэстэр.
Састааба:
Оҕурсу – 3 кг;
Мас арыыта – 250 мл;
Кетчуп – 250 мл;
Чили соус – 200 мл;
Уу – 150 мл;
Саахар – 150 г;
Уксус 9% – 100 мл;
Туус – 1,5 ч.нь.;
Томатнай паста – 2 ост.нь.;
Чеснок – 1 төбө;
Укроп зонтига – 1 уст.
Көстөрүүлэҕэ ууну, арыыны, кетчубу, чилини, томатнай пастаны, тууһу, саахары кутабыт. Барытын үчүгэйдик булкуйабыт уонна уһун синньигэс гына кырбаныллыбыт оҕурсулары эбэбит. Соуспутун оҕурсуга тарҕатан баран үчүгэйдик булкуйабыт уонна соус оргуйуор диэри 15 мүнүүтэ күүтэбит.
Соуспут оргуйбутун кэннэ укроп зонтигын, уксуһу, чесногу эбэбит уонна оҕурсуларбыт оливкалыы өҥнөнүөхтэригэр диэри өссө 10 мүнүүтэ туруорабыт.
Бааҥкаларга кутан хаппаҕынан ыга сабабыт. Бааҥкаларбытын сылаас сотторунан суулаан, умса ууран сойуор диэри туруорабыт. Сойбуттарын кэннэ тымныы сиргэ харайабыт.
Рецепты