Ойуунускай аатынан литературнай музей: саҥа чааһа
Бэҕэһээ, атырдьах ыйын 1 күнүгэр, сайыҥҥы күнү атаара, П.А. Ойуунускай аатынан литература музейыгар «Литературный музей: перезагрузка» диэн күүтүүлээх сэргэх тэрээһин ыытылынна. Бу тэрээһин бары баҕалаах, литератураны уонна искусствоны сэҥээрэр дьону муста. Кинилэр музей инники дьылҕатыгар кылааттарын киллэрэр уонна бэйэлэрин санааларын этэр ураты кыахтаннылар.
Сарсыардаттан ыалдьыттар айар дьоҕур уонна угуйуу эйгэтигэр умсугуйан, биллиилээх норуот суруйааччыларын Дмитрий Федосеевич Наумовы, Наталья Владимировна Михалева-Сайаны, Семен Андреевич Попов-Туматы, о.д.а. кытта автограф-сессияҕа уонна кэпсэтиигэ кытыннылар, хас биирдии киһи худуоһунньук эбэтэр суруйааччы оруолугар киирэн холонон көрдө, маастар-кылаастарга сырытта.
Тосхол чэрчитинэн музейдар уонна коллекционердар быыстапкалара буолан ааста, ону тэҥэ, түмэл үлэһиттэрэ кэлбит дьоҥҥо экскурсия ыыттылар.
Бу тэрээһиҥҥэ ураты болҕомто «Литературнай музей инникитэ: кэскиллэрэ, санаалара, бырайыактара» тиэмэҕэ төгүрүк остуолга уурулунна, онно кыттааччылар санааларын, этиилэрин үллэһиннилэр. «Литературнай музей: саҥа чааһа» диэн ааттаах «аан дойду кафетын» форматынан аһаҕас кэпсэтии музей комплексын сайдыытыгар кылаатын киллэриэн баҕалаах дьоҥҥо бэртээхэй платформа буолла.
Төгүрүк остуолга кыттааччылар музей сайдыытыгар сыһыаннаах үгүс билиҥҥи тиэмэлэри уонна этиилэри ырыттылар. Кэпсэтиигэ маннык өрүттэр көтөҕүлүннүлэр: кыттааччылар ыалдьыттарга көрөр эрэ буолбакка, холобур, цифровой технологиялары туһанан, процесска көхтөөхтүк кыттар кыахтаах интерактивнай быыстапкалары оҥорорго этии киллэрдилэр.
Оскуола оҕолоругар уонна устудьуоннарга литератураны уонна искусствоны үөрэтиигэ, ону тэҥэ айар дьоҕуру сайыннарыыга туһуламмыт үөрэх куурустарын, маастар-кылаастары оҥорорго идеялар дьүүллэһилиннилэр, аудиторияны кэҥэтии, социальнай ситимнэри туһанан, саастаах дьону интэриэһиргэтэр тематическай тэрээһиннэри ыытан, саҥа ыалдьыттары, ол иһигэр ыччаты, тардар стратегиялар ырытылыннылар.
Музей бырайыактарын олоххо киллэриигэ үбүлээһин кыаллар ньымалара ыйылыннылар, ол иһигэр граннары, спонсорствоны уонна бизнеһи кытта бииргэ үлэлэһии туһунан кэпсэттилэр.
Литература музейын саҥа дириэктэрэ Рустам Каженкин «төгүрүк остуол» кэпсэтиилэрэ суолталааҕын бэлиэтээтэ уонна музей литература эрэ түмэлэ буолбакка, култуура көхтөөх киинэ буолуохтааҕын тоһоҕолоото:
«Мин санаабар, Литература музейа үгэс уонна аныгы үйэ көрсөр сирэ буолуон сөп уонна буолуохтаах даҕаны. Биһиги литератураны барыларыгар тиийимтиэ уонна интэриэһинэй оҥорорго саҥа технологиялары уонна ньымалары туһаныахтаахпыт.
Хас биирдии киһи бэйэтигэр чугас сөптөөх эйгэни булан тэрийии улахан суолталаах — быыстапка, лиэксийэ, маастар-кылаас буоллун. Бииргэ үлэлээһин көмөтүнэн саҥа көрөөччүлэри уонна көлүөнэ литератураны үөрэтэргэ угуйуохпут диэн эрэнэбин», — диэтэ кини.
Кэпсэтии «аан дойду кафетын» форматыгар ааста, ол кыттааччылар санааларын көхтөөхтүк атастаһалларыгар олук уурда. Төгүрүк остуол түмүгэ Литература музейын инники сайдыытыгар төрүөт буолуоҕа уонна кэлэр сылларга стратегиятын оҥорорго көмөлөһүөҕэ диэн эрэнэбит уонна күүтэбит.
Анастасия Еремеева
Чолбон