Үгүлээккэ саха ынаҕын иитиини сөргүтэллэр
Бүлүү улууһун Үгүлээт нэһилиэгэр саха ынаҕын иитиини сөргүтүүгэ, сайыннарыыга улахан үлэ бара турар. Үгүлээттэр кэккэ сылынан ыраас хааннаах, тулуурдаах, хойуу үүттээх, минньигэс эттээх саха ынаҕын боруодатын өрөспүүбүлүкэҕэ тарҕатыахпыт диэн бигэ эрэллээхтэр диэн кэпсиир «Олох суола» хаһыат.
2019 сыллаахха нэһилиэк дьоно уопсай мунньахха саха сүөһүтүн иитиигэ көһөбүт диэн уураах ылыммыта. Саха ынаҕын үүтэ, этэ доруобуйаҕа ордук туһалаах диэн сыалтан быһаарыммыттара.
Ол кэмтэн ыла нэһилиэккэ баар симменталь оҕустары барытын төрөөтүн кытта аттатан иһэллэр. Ветеринария управлениетын кытта оннук кэпсэтиилээхтэр.
2019 сылтан нэһилиэк бюджетыгар субсидия көрөн, олохтоох «Үнүгэс» СХПК нөҥүө «Саха ынаҕа» судаарыстыбаннай тэрилтэни кытта дуогабардаһан саха оҕустарын атыылаһан ылаллар.
Үс сыл буола-буола оҕустарын уларыталлар. Быйыл эмиэ болдьоҕо туолбут, онон бу оҕустарын төһө да аһынналлар, атыылыыллар эбэтэр идэһэҕэ ыыталлар.
Маны таһынан былырыын Бүлүү улууһун дьаһалтата өйөөн, үгүлээттэр 50 төбө саха сүөһүтүн атыылаһан аҕалбыттар. Хотону нэһилиэк олохтоохторо бэйэлэрин күүстэринэн туппуттар.
«Билиҥҥи бириэмэҕэ саха оҕустара үлэлиэхтэриттэн сүөһүбүт боруодата тубуста, оҕолоро улахаттар, тулуурдаахтар, ынахтар үүттэрэ хойдон иһэр, идэһэ этэ минньигэс, эмис буолар эбит.
Онон бу өрөспүүбүлүкэ үрдүнэн биһиги, үгүлээттэр, маннык соҕотох нэһилиэк саха сүөһүтүн «обратное скрещивание» оҥорон, аны 8 хас сылынан ыраас хааннаах, тулуурдаах, үүтэ хойуу, этэ минньигэс Үгүлээт саха ынахтарын ылан өрөспүүбүлүкэҕэ тарҕатыахпыт. Бу ыра санаабыт туоларыгар бигэ эрэллээхпит», — диэн нэһилиэк баһылыга Октябрь Лукин үллэһиннэ.
Изольда Загитова
Тыа хаһаайыстыбата