«Бэйэм дойдубар олохтоох авиалинияҕа үлэлиир былааннаахпын»: авиационнай училище устудьуона Айаал Соловьев
Айаал Соловьев Хатырык нэһилиэгиттэн төрүттээх, Нам гимназиятын выпускнига. Айаал Дьокуускайга В.И. Гришуков аатынан авиационнай училище 2-с кууруһун бүтэрдэ. Бу училище авиация маршалын А.А. Новиков аатынан Санкт-Петербургтааҕы гражданскай авиация государственнай университетын филиала буолар, диэн «Эҥсиэли» хаһыат суруйар:
“Үөрэххэ туттарсарбар аттестат түмүгүн көрбүттэрэ, ону таһынан норматив толорбуппут: 1 км сүүрүү, 100 м сүүрүү уонна тардыныы. Уонна, биллэн турар, врачебнай-летнай экспертнэй комиссия ааспыппыт.
“Летная эксплуатация летательных аппаратов” диэн хайысханан үөрэнэбин. 20 бюджет миэстэтэ көрүллэр. Бүтэрдэхпинэ “Коммерческий пилот” диэн идэлээх буолабын. Маны таһынан, “Организация перевозок и управление на транспорте”, “Техническая эксплуатация летательных аппаратов и двигателей”, “Техническая эксплуатация электрифицированных и пилотажно-навигационных комплексов” хайысхаларынан специалистары бэлэмнииллэр.
Үөрэнэр группабытыгар уон алтабыт. Группабытыгар Саха сириттэн эрэ буолбакка, атын куораттартан кэлэн эмиэ үөрэнэллэр. Холобура, Иркутскайтан, Калининградтан, Пермьтэн, Уфаттан, Екатеринбургтан. Үс кыыстаахпыт: икки Саха сириттэн, биир Пермь куораттан. Билигин Оренбургскай уобалас Бугуруслан куоратыгар сайыҥҥы практикабын бара сылдьабын. Балаҕан ыйын бүтэһигэр диэри, ол эбэтэр 3 ый сылдьыахтаахпын. Практикабытыгар бастаан теорияны үөрэтэбит, онтон көтөргө көҥүл ыларга экзамен туттарабыт. Австрийскай Diamond DA40 диэн самолетунан көтөбүт. Бастакы куурус кэнниттэн номнуо көппүппүт: бастаан инструктордаах, онтон бэйэбит пилоттаан. Быйыл экипажтаах үлэни кытта билсэбит, онон однокурсникпынаан көтөбүт, үлэбитин үллэстэбит. 1 кууруска 45 чаас буоллаҕына, быйыл 97 чаас көтүөхтээхпит. Барыта чааһынан ааҕыллар. Икки аэродромнаахпыт. Маршрутунан көтөбүт. Эһиил 3-с кууруска икки мотордаах Diamond DA42 самолекка үөрэниэхтээхпит.
Үөрэхпин олус сөбүлүүбүн. Күн аайы саҥаны билэрим олус интэриэһинэй. Билигин манна биһиги, Саха сириттэн, Красноярскайтан, Санкт—Петербургтан устудьуоннар практика бара сылдьабыт. Олорор сирбит уруккута байыаннай база эбит, ол иһин казармаҕа майгынныыр.
Мин идэбэр саамай кылаабынайа – дьиссипилиинэ, бэрээдэк. Барытын бириэмэтигэр түргэнник толоруохха наада. Пилот идэтигэр үөрэнэргэ улахан баҕа наада. Баҕалаах оҕолор хаһыс да сырыыларыттан үөрэххэ киирэн сыалларын ситиһэллэр.
Төрөппүттэрим үөрэхпин сөбүлүүллэр, өйүүллэр. Бүтэрдэхпинэ бэйэм дойдубар олохтоох авиалинияҕа үлэлиир былааннаахпын.”
Дарина Константинова
Образование