Синоптиктар Саха сирин арҕаа өттүгэр чугастааҕы түүннэргэ хаһыҥ түһэриттэн сэрэтэллэр

Саха сирин киин балаһатыгар бүгүн, атырдьах ыйын 6 күнүгэр, күнүскү чэйтэн киэһэ күһүн иһэрин биллэрэрдии халлааммыт эмискэ сөрүүдүйдэ. Хотуттан хаҕыс тыал тохтоло суох үрэн сирилэтэр. Бөлүүн Өлөөн Харыйалааҕар түгэҕэр уулаах солуур тоҥон үрүмэлэммит хаартыската  бассаабынан тарҕанна.

Гидрометеорология уонна тулалыыр эйгэни мониториннааһын Саха сиринээҕи салалтатын салайааччытын солбуйааччы – Гидрометеорология киинин начаалынньыга Татьяна Маршалик иһитиннэрэринэн, атырдьах ыйын 7 уонна 8 күннэригэр киин улуустарга салгын температурата күнүс +13… +18 кыраадыска диэри сөрүүдүйүө итиэннэ арҕаа Мииринэйгэ, Ленскэйгэ, Бүлүү сүнньүнээҕи улуустартан Сунтаарга, Ньурбаҕа түүнүн халлаан халыннаҕына -2 кыраадыска диэри тоҥоруон,  атырдьах ыйын 8 түүнүнээҕи хаһыҥ Куорунай улууһун эмиэ хаарыйыан сөп.

Гидрометкиин билгэлииринэн сарсын, атырдьах ыйын 7 күнүгэр, өрөспүүбүлүкэ хотугулуу-илин өттүгэр Томпо, Муома, Абый улуустарыгар хайалаах сирдэринэн инчэҕэй хаар булкаастаах дохсун ардах түһүө. Бүлүү умнаһыгар, киин улуустар арҕаа эҥээрдэригэр быстахтык ардыа. Өлүөнэ алын сүүрүгэр уонна Эбээн Бытантайга этиҥнээх ардах кэмигэр сөкүүндэҕэ 15-20 миэтэрэ түргэннээхтик тыалырыа. Бүлүү сүнньүнээҕи улуустарга түүнүн дьайҕардаҕына, 0… -2 кыраадыска тиийэ намтыа. Хоту эмиэ халыннаҕына 0… -5 диэри тоҥоруо. Саха сирин киин балаһатыгар күнүһүн +13… +18, соҕуруулуу-арҕаа, соҕуруу уонна соҕуруулуу-илин эҥээрдэригэр +17… +22, хотугулуу илин +5… +10 кыраадыска тиийэ сөрүүдүйүө.

Атырдьах ыйын 8 күнүгэр хотугулуу-илин, соҕуруу, соҕуруулуу-илин, арҕаа уонна киин улуустарга көтө сылдьан быстахтык ардыа, сорох сиринэн этиҥ аргыстаах буолуо. Түүнүн арҕаа эҥээргэ +1… +6 кыраадыска диэри намтыа, оттон намтал сирдэргэ уонна хотугулуу-илин халыннаҕына, -4, +1 кыраадыстаах хаһыҥ түһүө. Күнүһүн кытта Хотугу муустаах байҕал кытылыгар 0, +5 кыраадыска диэри тымныы тыына биллиэ. Атырдьах ыйын 9 күнүгэр арҕаа эҥээртэн ураты сиргэ салгыы ардыаҕа.

Василий НИКИФОРОВ.

Хаартыска Эвелина Попова, Улус.Медиа.

УлуусМедиа