Оттооһун хаамыыта: кэлэр кыстыкка былааннаммыт от үстэн биирэ кэбиһилиннэ
Атырдьах ыйын 7 күнүгэр түмүллүбүт дааннайынан, былааннаах 434 334 туонна оттон 148 тыһыынчата кэбиһилиннэ. Онон былаан үстэн биирэ, 34 бырыһыана, туолан иһэр. Ити гынан баран, оттооһун тэтимэ бытаанын былырыын баччаҕа 195 231 туонна от турбута туоһулуур.
Быйыл сайыны быһа ханан даҕаны ардах отчуттары атахтаата. Бу нэдиэлэ саҥатыгар Ил Дархан Айсиэн Николаев улуустар салайааччыларыгар от үлэтигэр туох баар ис кыаҕы барытын туһанан, оттооһун хаамыытын тэтимирдэргэ ыйыы биэрбитэ. Отчуоттанар кэмҥэ Саха сирин ходуһаларыгар 23 312 киһи оттуу сылдьар. Отчуттар истэригэр 10 033 тыраахтар күүһүн көлүнэр 3 426 толору мэхэньисээссийэлээх, 3 522 ситэтэ суох сэбилэниилээх звенолар бааллар. Балары таһынан ат көлөлөөх 63 уонна 2 002 илии звенолара оттууллар.
Дьоҕус былааннаах хотугу улуустартан Аллайыаха уонна Усуйаана баччаҕа диэри сибидиэнньэ киллэрэ иликтэр. Эбээн Бытантай 1 бырыһыаннаах. Ардах халааныттан эмсэҕэлээбит Өймөкөөн улууһугар 272 туонна от кэбиһиилэнэн, 7 бырыһыаҥҥа тириэртилэр. Ааспыт сырыыга эмиэ бэлиэтээбитим курдук, бу улуус эрдэ 3 660 туонна от былааннааҕын оттонор сирдэрэ ууга былдьанан, алдьанан, бэйэтин күүһүнэн 1 438 туоннатын (41 бырыһыанын) буларга суоттанар.
Хоту эҥээртэн абыйдар, орто уонна үөһээ халымалар ордук хоннохтоохтук оттуу сылдьаллар. Обургу былааннаахтарга Мэҥэ Хаҥалас отчуттара инники иһэллэр, былааннаах отторун аҥаарыттан ордугун кэбистилэр. Уус алданнар эмиэ ортолоһон эрэллэр. Үгэспитинэн, өрөспүүбүлүкэ орто көрдөрүүтүн куоһаран иһэр улуустары билиһиннэрэбит (табылыыссаҕа көр).
Оту таһынан нэдиэлэ анараа өттүгэр Хаҥалас отчуттара 600 туонна сиилэһи укпуттара ол көрдөрүү оннунан турар. Атыттар сиилэстээһини саҕалыы иликтэр. Инньэ гынан, былааннаммыт сиилэстэн билиҥҥитэ 2 эрэ бырыһыана туолла. Сенажтааһыҥҥа икки улуус киирдэ: Мэҥэ Хаҥаласка 50, Аммаҕа 20 туонналыыны суулаатылар. Онон былааннаммыт кээмэйтэн 1 бырыһыана туолан иһэр.
Халлаан сирэйин-хараҕын кэтэһэн, күнү-хонугу бараабакка, туустаан-тумалаан харса суох оттоотоххо эрэ сатаныыһы бадахтаах. Тыа хаһаайыстыбатын уонна ас-үөл бэлиитикэтин министиэристибэтэ улуустартан төһө-хас мобильнай биригээдэни тэринэллэрин туһунан сайаапкалары атырдьах ыйын 20 күнүгэр диэри хомуйарын иһитиннэрэбит.
Василий НИКИФОРОВ
сенокос