«Кэнчээрилэр» – Кыргызстаҥҥа, Иссык-Кульга
Бу ый 18 күнүгэр Россия үтүөлээх кэллэктиибэ – Уус-Алдан улууһун “Кэнчээри” оҕо норуодунай ансаамбылын оҕолоро Кыргызстан Республикатыгар Аан дойдуга аатырбыт Иссык-Куль кытылыгар баар оҕо лааҕырыгар сынньана көттүлэр.
“Кэнчээрилэр” Кыргызстан Өрөспүүбүлүкэтин культуураҕа уонна ыччат дьыалаларыгар министерствотын ыҥырыытынан бардылар. Ыҥырыыны Ил Түмэн бастакы вице-спикерэ Александр Жирков Саха сирин делегацията ааспыт сыл Кыргызстан Өрөспүүбүлүкэтигэр бара сылдьыытын түмүгүнэн Ил Дархан Айсен Николаев биэрбит сорудахтарын боротокуолугар киллэртэрэн тэрийбитэ.
Саха сирин оҕолоро сайыҥҥы сынньалаҥҥа Россия тас өттүгэр сынньана бараллара Өрөспүүбүлүкэ бюджетыгар көрүллүбэт буолан, оҕолор айанныыр уонна антах тиийэн олорор, сынньанар төлөбүрдэрин үгүс өттүн Александр Жирков “Эльгауголь” диэн Саха сирин соҕуруу өттүгэр чоҕу хостуур тэрилтэ өрөспүүбүлүкэҕэ угар үбүн суотугар оҥоттордо.
Манна даҕатан эттэххэ, Александр Жирков көмөтүнэн аҕыйах сыллааҕыта “Кэнчээрилэр” Соҕуруу Кореяҕа сынньана бараллара былааннаммыта. “Ковид” диэн дьаҥтан мэһэйдэтэн, онтон санкцияларынан сылтаан ол барыы кыаллыбатаҕа. Былааннаммыты тиһэҕэр тиэрдэн, “Кэнчээрилэр” бу сырыыга аймахтыы Кыргызстан сиригэр көттүлэр.
Дуогабарынан көрүллүбүтүн курдук “Кэнчээри” ансаамбыл В.С. Парников салайааччылаах 24 оҕото Кыргызстаҥҥа 10 хонук буолуоҕа. Программаларыгар сынньалаҥ лааҕырын таһынан Бишкек куорат бэлиэ сирдэригэр экскурсия, Максим Аммосов, Чингиз Айтматов памятниктарыгар сылдьыы, кыргыз оҕолорун Саха норуотун культуратын кытта билиһиннэрии буолуоҕа.
Оҕолорбут сарсыарда Дьокуускайтан көппүт күннэрин киэһээтигэр Новосибирскайынан Бишкеккэ этэҥҥэ көтөн тиийдилэр. “Манас” аэропордугар “Кэнчээрилэри” лааҕыр салалтата үөрэ-көтө көрсөн, оҕолору аһатан, кыратык сынньатан баран тута Иссык-Кульга (кыргызтар бу ааты “Итии, Сылаас Күөл” диэн тылбаастыыллар, Александр Николаевич буоллаҕына түүрдүү “Ытык Күөл” диэн аат саһа сылдьар диир) айаннаатылар.
Улууспут айар талааннаах, дьоҕурдаах оҕолоругар, “Кэнчээрилэргэ” этэҥҥэ, үтүөкэн сырыыны баҕарыаҕын!
С. Васильев, Ил Түмэн
Ил Тумэн