Айсен Николаев «Якутия — Земля героев» бырагыраама туһатын кэпсээтэ
«Якутия — Земля героев» өрөспүүбүлүкэтээҕи каадыр бырагырааматын туһунан Айсен Николаев «Ил Дарханныын кэпсэтии» биэрии кэмигэр сырдатта.
«Бастакы сүүрбэ биэс киһи үөрэх бастакы түһүмэҕин түмүктээтэ. Кинилэр бары министиэристибэлэргэ, улахан тэрилтэлэргэ, улуус, итиэннэ куорат салалталарыгар тустаах стажировкалары ааһыахтара», — диэн эттэ.
Ил Дархан бэлиэтииринэн, байыаннай дьайыы бэтэрээннэригэр бу үөрэх дойдуга, өрөспүүбүлүкэҕэ үчүгэй үлэһит, солбуллубат салайааччы буола үүнэллэригэр, сайдалларыгар дьоһун тирэх буоларыгар саарбахтаабатын этиннэ.
«Күн бүгүн икки киһи билигин миниистир солбуйааччыларынан ананан үлэлэрин саҕалаатылар. Маны сэргэ, «Время героев» федеральнай бырагыраама чэрчитинэн бастакы түһүмэххэ биһигиттэн Россия Дьоруойа Игорь Юргин үөрэммитэ. Маны тэҥэ, билигин икки Арассыыйа Дьоруойдарбыт Дмитрий Куценко, Николай Соболев бу бырагырааманан үөрэнэ сылдьаллар. Мин кинилэргэ сүбэһит быһыытынан сылдьабын, бэйэлэрин кытта кэпсэтэбин, олох-дьаһах туһунан санаабытын атастаһабыт. Уолаттар инникитин киэҥ эйгэҕэ, федеральнай таһымҥа таҕыстахтарына, төрөөбүт дойдуларыгар туһалаах дьон буолуохтарыгар саарбахтаабаппын», — диэн Айсен Сергеевич тоһоҕолоон эттэ.
Лана Александрова хаартыската
Время героевСВО