Өймөкөөҥҥө балаһыанньа байыаннай, ардах иккис халаана кэбиһиилээх оттору былдьаата
Өймөкөөн улууһугар Индигиир кытылынан олорор бөһүөлэктэр сирдэрин-уоттарын ардах халаана быйыл сайын иккистээн ылла. Быһата, дьону сүгүн оттоппото. “Суол сабыллыан иннинэ илин эҥээрдээҕи улуустартан көмө от тиэйиллибэтэҕинэ, сүөһүбүтүн лаппа сарбыйар туруктанныбыт”, – диэн айылҕа атаҕастабылыгар түбэспит хотугу улуус олохтоохторо айманан эрэллэр.
Өймөкөөҥҥө үөскээбит дьиҥ балаһыанньаны билээри, бүгүн сарсыарда улуус тыатын хаһаайыстыбатын салалтатын салайааччыта Инна Яковлеваны кытта кэпсэтэ сырыттым.
“Ардах ааспыт нэдиэлэни супту түстэ. Арыычча уоскуйбута 2-3 эрэ хонно. Билигин даҕаны көтө сылдьан, кыралаан түһэр. Уу үөһэ хайалартан киирэ, эбиллэ турар. Сорох сиринэн түһэр. Онон билигин бачча кэбиһиилээх от уонна бугул ууга былдьанна дииргэ уустук. Уу ылыан иннинэ 507 туонна оту туруорбуппут. Отчуттарбыт билигин уу түһэрин күүтэллэр. Отторун ыһан куурдуохтарын кураанах сир даҕаны суох. Онон балаһыанньабыт байыаннай. Быһа холоон, суол сабыллыан иннинэ төһө туонна оту атыылаһан тиэйтэрэрбитин суоттанан олоробут. Үөһэ үбүлээһин боппуруоһун туруорсан, үлэ бара турар. Улуустан эмиэ көмөлөһүннэриэхпит”, – диир Инна Семеновна.
Сүөһү-ас тутар тыа хаһаайыстыбалаах нэһилиэктэр – Өймөкөөн, Сордоҥноох, Үчүгэй, Томтор, Төрүт дьүккү бары ардах халааныгар эмсэҕэлээбиттэр. Быйыл сайын от үүнүүтэ биир улуус иһигэр эриэн эбит. Холобур, Сордоҥнооххо балачча үчүгэйдик тэппит буоллаҕына, Томторго мөлтөһүөрдүк үүммүт. Өймөкөөн улууһа быйыл сайын 3 660 туонна оту бэлэмниир былааннааҕыттан, ардах бастакы халаанын содулугар 1 488 туоннаҕа диэри кыччатан, 41 эрэ бырыһыанын хааччынар кыаллыан сабаҕалаабыттара. Инньэ гынан, атын киин улуустартан 1200-чэ туонна от атыылаһыллан тиэйиллиэхтээҕэ биллибитэ. Ону ардах иккис халаанын кэнниттэн эрдэлэтэр балаһыаньа үөскээтэ итиэннэ күүтэн олорбокко, уустук дьылларга буоларын курдук, хаар түһүөр диэри оттуурга, былыргылыы-сэбиэскэйдии муус үрдүнэн ходуу ходуйарга Өймөкөөн үлэһит дьонун күннэрэ-дьыллара илэ-бодо күһэйдэ.
Василий Никифоров
Өссө ааҕыҥ: Отчукка сүбэ: ардахтаах сайын оту сатабыллаахтык кэбиһэр-харайар ньымалар паводокСельское хозяйствосенокос