Илиҥҥи фрону көмүскээбит старшай лейтенант Степан Денисов
Старшай лейтенант Степан Денисов 1907 сыллаахха Орджоникидзевскай оройуон Хахсык нэһилиэгэр төрөөбүтэ. Саха киһитэ этэ. 1932 сылтан ССКП чилиэнэ. Бу туһунан «Хаҥалас» хаһыат суруйар.
Степан Денисов 1930 сыллаахха Дьокуускайдааҕы педтехникум бүтэрээт, Иркутскайдаабыта. Иркутскайдааҕы пединституту түөрт сыл ситиһиилээхтик бүтэрэн, Дьокуускайдааҕы педрабфакка үөрэх чааһын сэбиэдиссэйинэн үлэлээбитэ.
1939 с. олунньутуттан Степан Гаврильевич “Социалистическай Якутия” хаһыат редакторын солбуйааччытынан, эһиилигэр партия обкуомун лекторынан үлэлээбитэ.
Сэрии саҕаланыыта,1941 сыл от ыйыгар Кыһыл Аармыйа политүлэһиттэрин куурсугар Читаҕа үөрэххэ барбыта. Атырдьах ыйыгар Монгольскай Народнай өрөспүүбүлүкэҕэ баар 60-с танковай дивизия «Натис» диэн хаһыатыгар литературнай үлэһитинэн анаммыта.
1942 сыл олунньутугар Степан Денисов Забайкальскай байыаннай уокурук партактыыбын куурсугар үөрэммитэ. Куурсун бүтэрэн баран, бастаан учебнай батальон агитаторынан, онтон 329-с армейскай госпиталь агитаторынан (МНР-га) үлэлээбитэ.
Империалистическай Японияны утары сэриигэ Денисов С.Г. артиллерийскай биригээдэ политотделыгар агитатордаабыта. 1946 с. Советскай Аармыйаттан демобилизацияламмыта.
Саха сиригэр кэлэн партия обкуомун лекторынан, горком пропагандаҕа уонна агитацияҕа салаатын сэбиэдиссэйинэн үлэлээбитэ. Дьокуускайдааҕы горком бюротун чилиэнинэн талыллыбыта.
Норуот үөрэхтээһинин туйгуна, Саха АССР оскуолатын үтүөлээх учуутала, историческай наука кандидата, саппаас офицера Денисов Степан Гаврильевич кэлин Учууталлар билиилэрин үрдэтэр институкка история кабинетыгар сэбиэдиссэйдээбитэ. Онно сылдьан кини бэрт элбэх методическай ыйыылары, үлэлэри суруйбута. Институт ыҥырар курстарыгар лекция ааҕара, үлэлэрин салайара. Институкка үлэлиир кэмигэр Саха АССР Үөрэҕин министиэристибэтин кытары сибээһин быспатаҕа.
(«Хаҥалас бойобуой офицердара», 2010 с. кинигэттэн)
восточный фронт