Табалаах табаһыттара оҕолорун оскуолаҕа үөрэхтэригэр ыытаары бөртөлүөт күүтэллэр

Дьааҥы улууһун Табалаах нэһилиэгин “Хара Салаа” община-ТХПК табаһыттара этэҥҥэ сайылыы сылдьабыт диэн биллэрэллэр. Аныгы кэм сайдыытынан табаһыттар быйыл аргыстан хабар интэриниэт сибээстэнэн, киин сири кытта билсэ, кэпсэтэ олороллор.

Община — кэпэрэтиип бэрэссэдээтэлэ Александр Потапов кэпсииринэн, кэлиҥҥи сылларга өрөспүүбүлүкэ бырабыыталыстыбатын дьаһалынан табаны иитиигэ ботуччу үп көрүллэрэ уонна төрүт олохтоох аҕыйах ахсааннаах омуктар таба ииттэр сирдэригэр чугас сир баайын хостуур тэрилтэлэргэ этнологическай экспертиза ыытыллан, олус элбэҕэ даҕаны суох буоллар, табалаах хаһаайыстыбаҕа толуйуу үбүн төлүүллэрэ көмөлөөх буолбут. Ол түмүгэр “Хара Салаа” кэпэрэтиип — община таба көрөр, сайылыыр — кыстыыр сирдэригэр аныгы матырыйаалларынан 3 дьиэ туттар, саҥа мобильнай электромотуор ылынар уонна аныгы интэриниэт сибээстэнэр кыахтаннылар.

Александр Александрович Дьааҥы улууһун дьаһалтата (баһылык В. М. Иванов), тыа хаһаайыстыбатын салалтата (начаалынньык К.С. Ефимова) табаһыттарга болҕомтолорун ууралларын, Аартыка сайдыытыгар уонна төрүт олохтоох хотугу омуктар дьыалаларыгар министиэристибэ (миниистир В.Н. Черноградскай) таба мэччийэр сирдэригэр үлэлиир бырамыысыланнай тэрилтэлэри хонтуруоллуулларын бэлиэтиир. Бу сылларга министиэристибэ Дьааҥы Табалаах нэһилиэгин сиригэр сир баайын хостуур “Дальзолото” ХЭУо уонна “Звезда” АУо тэрилтэлэри кытта этнологическай экспертизалары ыыппыт. Сир баайын хостуур тэрилтэлэр хоромньу таһааралларын чинчийэр этнологическай экспертиза 5 сыл буола-буола ыытыллар.

Табалаах табаһыттара бу күннэргэ Чаркы диэн үрэх тардыытынан Чаркы үрэх баһа Муолакаан диэн сиргэ, Дьааҥы таас хайаларын быыһынан көһөн, сайылыы сылдьаллар. Ыстаадаҕа 600 — чэ табалаахтар, балтараа сүүсчэ тугут төрүөҕүн ыллылар.

Табаһыттар быйыл ойуур уота суох, күүгэс үөн аҕыйах буолан, бэркэ сайылаан эрэллэрин кэпсииллэр. Ыстаадаҕа билигин Эдуард Семенович Винокуров кэргэнэ, чуумсук Алена Константиновналыын уоллара, быйыл XI кылааска тахсыбыт Павелы уонна быйыл оскуолаҕа саҥа киириэхтээх кыыстарын илдьэ үлэлии сылдьаллар.

Маны таһынан общинаҕа төрүт удьуор табаһыт Радион Семенович Голиков баар. Голиковтар быйыл сайын оҕолоро оскуолаҕа эксээмэннээх буоланнар, ыстаадаҕа дьиэ кэргэнинэн сайылыы тахсыбатылар, эһиил сайылыахпыт диэн былааннаналлар.

Бу күннэргэ, атырдьах ыйын бүтүүтэ Табалаах нэһилиэгин “Хара Салаа” община табаһыттара нэһилиэк, улуус дьаһалталара дьаһайаннар, бөртөлүөт кэлэрин эрэнэ күүтэллэр. Көтөр аал оскуола оҕолорун бөһүөлэккэ аҕалара уонна бөһүөлэктэн ыстаадаҕа көмө табаһыты кытта араас суһал таһаҕаһы илдьэрэ былааннанар.

Владислав Кривошапкин

УлуусМедиа