“Хас биирдии саа – саллаат олоҕо, тыыннаах хаалар мэктиэтэ”, – диир Хаҥыл

Анал байыаннай дьайыы буола турар сириттэн “Хаҥыл” диэн позывнойдаах Хаҥалас Нөмүгүтүн хоһуун ыччата Василий Афанасьев бу күннэргэ Дьокуускайга хомондьуруопкаҕа кэлэн үлэлии сылдьар. Кэлбит сыала-соруга диэн дроннары суулларарга анаан доруоп саалары хомуйан илдьэ барыахтаах.

– Байыаннай дьайыыларга мин 2024 сыл муус устар ыйыттан кыттабын, – диир Василий Владимирович. – Былырыын бойобуой сорудахха штурмҥа сылдьан, доруоп саа трофейдаах кэлбитим уонна онтубунан хас да дрону суулларбытым. Саабын бойобуой сорудахтарга илдьэ сылдьан бараммын, тус уопуппар олоҕуран, дроннары кытта охсуһарга көдьүүстээх эбит диэн түмүккэ кэлбитим. Бэйэм уонна штурмалыыр бөлөххө бииргэ сылдьар уолаттарым тыыннарын ити  курдук хаста даҕаны өрүһүйбүтүм. Ол иһин саанан ытыан баҕалаах саллааттары полигоҥҥа дьарыктыыр туһунан идиэйэбин дивизиябыт хамандыырыгар эппиппэр генерал: “Аныгы сэптэри кытта доруобунан хайдах сэриилэһээри гынаҕын”, – диэн күлбүтэ. “Оччоҕуна БПЛА-шниктары кытта полигоҥҥа киириһиннэр”, – диэбиппэр сөбүлэспитэ. Полигоҥҥа саһан сыттахпына, 3 камикадзены ыытан көрдөппүттэрин үһүөннэрин суулларбытым. Онно биирдэ итэҕэйбиттэрэ.

Биир дойдулаахпыт, “Мясной двор” тэрилтэлээх Айаал Макаров уонна Москубаттан компакт-спортинынан дьарыктанар 2 урбаанньыт  көмөлөһөннөр, тэриэлкэ ытар былаһаакка тэриммиппит. Бастакыбытын былырыын ахсынньы 10 күнүгэр арыйбыппыт. Билигин 2 былаһааккалаахпыт. Бу кэмҥэ диэри 500-тэн тахса киһини бэлэмнээтибит. Иккиһинэн, саанан хааччыйыы боппуруоһа турбута. Сэрии сэбэ буолбатах буолан, доруоп саа аармыйа балаансатыгар суох. Саха сириттэн 10-нуу, 15-тии сааны уора-көстө илдьэ тиийэллэрин сокуоннайдык быһаарар наадата тирээбитэ. Тохсунньуга дойдубар уоппускаҕа кэлэ сылдьар кэммэр Ис дьыала уорганын, Росгвардия эппиэттээх үлэһиттэрин кытта мунньахтааммыт доруоп саалары харгыһа суох тиксэрэр мэхэньииһими тобулбуппут.

 Василий Афанасьев суолун солонон баран, ол кэнниттэн саас кэлэн, 320 доруоп сааны илдьэ барбыт. Сааны икки ньыманан хомуйаллар: бастакыта – дьон баҕа өттүлэринэн аҕалан туттараллар; иккиһэ – Росгвардияҕа тутуллан-былдьанан сытар саалартан талан ылаллар. Ити 320 көҥдөйтөн дьон аҕалан биэрбитэ – 123. Баҕа өттүлэринэн буолан, төлөбүрэ суох, босхо. “Хас биирдии саа – саллаат олоҕо, тыыннаах хаалар мэктиэтэ. Бастакы хомуйан илдьибит сааларбын 394-с полкаҕа анаан туттарбытым, полкаҕа сулууспалыыр саха уолаттара бары кэриэтэ сааламмыттара. Онон бойобуой сорудахха штурмҥа баралларыгар дроннартан көмүскэллээх буолан, эрэх-турах сананаллар. Биллэрин курдук, билигин технология сэриитэ бара турар. Байыастарга бастакы нүөмэрдээх өстөөхпүт – дрон”, – диэн кэпсиир  Хаҥыл.

Кини сулууспалыыр 127-с дивизията 5-с аармыйаҕа киирэр. Дивизия 3 мотострелковай уонна 1 танковай полкалартан итиэннэ 3 мотострелковай штурмовой биригээдэлэртэн турар. Барыта 15 тыһ. киһи сулууспалыыр. Манна сыһыаран суруйдахха, Василий Афанасьев-Хаҥыл “Хорсунун иһин”, “Сэриигэ уһулуччутун иһин”, “Штурм иһин” уонна “Анал байыаннай дьайыы кыттыылааҕа” мэтээллэринэн наҕараадаламмыт. Быйыл бэс ыйыгар диэри “Шторм” этэрээккэ сылдьыбыт. Онтон судаарыстыба наҕараадатын тутан, сууттаммыт ыстатыйата уһуллан, ырааһырбыт. Онон билигин  кини көннөрү хантараакка сулууспалыыр байыас быһыытынан  “дивизия ыстаарсай инструктора” диэн сололоох эбит. Бу сырыытыгар бүтүн дивизияҕа анаан 500 сааны хомуйар былааннаах. Билиҥҥитэ, ааспыт биир нэдиэлэ устатыгар Росгвардия көҥүл биэрэр хонтуоратыгар (Дьокуускайга “Дзержинскэй” уулусса 35/1 дьиэтигэр туталлар) 70-тан тахса сааны аҕалан биэрбиттэр.

“Хайдах баҕарар, ол гынан баран 12-с халыыбырдаах эрэ сааны тутабыт, 16-лаахха эҥин ботуруона көстүбэт. Саа докумуона суох уонна көҥүлүн болдьоҕо ааспыт даҕаны буоллун. Дьиҥинэн, докумуоннаах саа кэбэҕэстик оҥоһуллар бөҕө буоллаҕа. Хомуйбут саабытын барытын байыаннай чаас балаансатыгар учуокка туруораллар. Байыастарга син АК кэриэтэ, байыаннай билиэттэригэр бэлиэтээн туран, эппиэтинэскэ туттараллар. Онон байыас аптамаатын кытта саатын булгу илдьэ сылдьар. БК-кэр эбии ыйааһын буолар эрээри, киһи олоҕо оннооҕор күндү. Миигиттэн: “Хайдах саа ордугуй?” – диэн үгүстүк ыйыталлар. Ыта үөрэннэххэ, ханнык баҕарар саа үчүгэй. Ол гынан баран, 2-3 дрон биирдэ саба көтөн кэллэҕинэ, полуаптамаат элбэхтэ ытарынан тыын былдьаһыгар ордук буолар. Нэһилиэнньэттэн саа ботуруонун эмиэ тутабыт. Эргэ даҕаны буоллун, дьарыкка барсар. Сибиэһэйдэрин бойобуой сорудахха туттабыт. Балтараа сыллаах быраактыкам көрдөрөрүнэн, дроннары 3 №-дээх доруоптаах, 36 кыраамнаах магнум, полумагнум ботуруоннар ордук табаллар, хотуталлар эбит”, – диир дивизия ыстаарсай инструктора. Хаҥыл тус бэйэтэ өстөөх 60-тан тахса дронун суулларбыт.

Василий Афанасьев: “Өскөтүн, анал байыаннай дьайыы уһаатаҕына, доруоп сааҕа наадыйыы мантан күһүн өссө улаатыа”, – диэн сабаҕалыыра оруннаах. Дойдубут баһылыга Владимир Путин быйыл сайын бэс ыйын 6 күнүгэр “Норуот фрона” хамсааһын “Арассыыйа иһин” бырайыактарын быыстапкатын көрүү түмүгүнэн оборуона миниистирэ Андрей Белоусовка байыаннайдар уонна баҕа өттүлэринэн сулууспалааччылар пилота суох көтөр тэриллэри утары доруоп сааны тутталларыгар анал куурустары ыытарга дьаһал биэрбитэ.

Василий Никифоров

Хаартыскалар В.В. Афанасьев тус архыыбыттан туһанылыннылар

УлуусМедиа