Оттооһун хаамыыта: “Сатай” уокурук уонна Өлүөхүмэ, Амма улуустара былааннарын толордулар

Кэлиҥҥи нэдиэлэҕэ халлааммыт салгыы курааннаан, ааспыкка сабаҕалаабыппыт курдук, атырдьах ыйын 28 күнүгэр өрөспүүбүлүкэ үрдүнэн былааннаах оттон 80 бырыһыана туолла. Барыллаан сабаҕалааһынынан, кэлэн иһэр сүөһү-сылгы кыстыгар былааннаммыт 434,3 тыһ. туонна оттон улуустар бэйэлэрин сирдэригэр 91 бырыһыанын булунар кыахтаахтар.

Итиннэ хаһаайыстыбалар тэриммит мобильнай биригээдэлэрин ыраах сытар, суола-ииһэ суох учаастактарга тиийэн бэлэмниэхтээх 41 тыһ. туонна отторо  ааҕыллан сылдьар. Маны таһынан кыбыыларга, сыһыыларга былырыыҥҥы быйаҥтан ордон курулаабыт 16,9 тыһ. туонна кэбиһилээх оту эбинэн, кыстыкка дороххой аһылыгынан 95 бырыһыан хааччыллабыт диэн Тыа хаһаайыстыбатын уонна ас-үөл бэлиитикэтин министиэристибэтигэр суоттаналлар.

Быйыл сайын от үлэтин эрдэттэн кимиилээхтик саҕалаабыт улуустар тэтимнэрин ыһыктыбакка иһэллэрин өссө төгүл тоһоҕолоон бэлиэтиибит. Ол курдук, былаана төһө даҕаны кыратын иһин, “Сатай” куораттааҕы уокурук 450 туонна кэбиһиилэнэн, 350 туонна былааннаммытын лаппа аһара түстэ (129%) уонна былааны толорууга бастаата.  Иккискэ Өлүөхүмэ бааһынайдара күөрэс гыннылар: 14,5 тыһ. кэриҥэ оту туруоран, былааннаах кээмэйдэрин куоһардылар (102%). Аммалар 30 716 туонна кэбиһиилэнэн, былааннарын лоп курдук 100 бырыһыан толордулар. Онон былааннаах отун 3 муниципальнай тэриллии атырдьах ыйын иһинэн ылла.

Бу кэмҥэ 90 бырыһыаннаах кирбиини 4 улуус отчуттара (табылыыссаҕа көр) аһардылар: Үөһээ Бүлүү 95, Ленскэй 93, Мэҥэ Хаҥалас 92 уонна Уус Алдан 90  бырыһыаннаахтар. Санатыстахха, саамай улахан былааннаах Мэҥэ Хаҥалас улууһа 44 369 туонна от былааннааҕыттан бэйэтин сирдэриттэн 41 806 туоннатын (94 бырыһыанын) ыларга суоттанар. Онон аны 1 тыһ. тахса туонна оту туруорара хаалла. Ол эрээри, Уус Алдан улууһа сабаҕалаабыт 27 612 туонна отун аһардар (билиҥҥи туругунан, 27 850 т кэбиһиилэннэ) даҕаны, отчуттар уоскуйар санаалара суох.

Отчуоттанар кэмҥэ өрөспүүбүлүкэ 12 улууһугар 168 мобильнай биригээдэ тэриллэн, оттуу сылдьар. Кинилэр холбоон 12 992,4 туонна от кэбиһиилэннилэр. Аммаҕа 6 биригээдэ 3 620 туонна, Хаҥаласка 24 биригээдэ 3 423 туонна, Уус Алдаҥҥа 26 уонна Бүлүүгэ 25 мобильнай биригээдэлэр 1,5-лыы тыһ. тахсалыы туонна оту туруордулар. Инньэ гынан, барыллаан ааҕыынан, мобильнайдар оттуохтаах кээмэйдэриттэн үстэн биирин бэлэмнээтилэр.

Оту сэргэ сүөһү сүмэһиннээх аһылыгар бу кэмҥэ 14 442 туонна сиилэс угулунна (былааннаммыт кээмэйтэн 60 бырыһыана) уонна 3 209 туонна сенаж сууланна (былааннаммыттан 24 бырыһыана). Онон сиилэстээһиҥҥэ уонна сенажтааһыҥҥа былааннаах хаһаайыстыбалар ааспыт сыл туһааннаах кэминээҕи көрдөрүүнү 200-тэн тахсалыы бырыһыанынан куоһаран иһэллэр.

Василий Никифоров

УлуусМедиа