Тыа хаһаайыстыбатын миниистирэ ардах халааныттан эмсэҕэлээбит Өймөкөөн хаһаайыстыбаларыгар сылдьар
Быйыл сайын уһун, дохсун ардах халааныттан иккитэ эмсэҕэлээбит Өймөкөөн улууһугар тыа хаһаайыстыбатын уонна ас-үөл бэлиитикэтин миниистирэ Артем Александров тиийэн, бааһынай уонна кэтэх хаһаайыстыбалаах дьону кытта сирэй көрсөн, билигин тирээн турар быһыыны-майгыны илэ билсэ-көрө сылдьар.
Иллэрээ күн уонна бэҕэһээ миниистир Өймөкөөн улууһун баһылыга Александр Оконешниковтыын Уус Ньараҕа, Төрүккэ, Өймөкөөҥҥө уонна Томторго сырыттылар. Улуус киин бөһүөлэгэр бааһынай хаһаайыстыбалаах урбаанньыт Сергей Стенин фермата хотугу кээмэйинэн балачча улаханын уонна бигэтик үлэлиирин бэлиэтээтилэр, инникитин хайдах кэҥиэн сөбүн сүбэлэстилэр. Аара Балаҕаннаахха Кондаковтар сылгылара турар базатыгар таарыйдылар. Онтон Төрүккэ тиийэн, нэһилиэк олохтоохторун кытта атах тэпсэн олорон кэпсэттилэр. Тыа сирин сүөһүлээх-сылгылаах ыаллара, сүрүннээн, Алдан өрүһү туоратар паром сырыыта тохтотуллуор диэри тастан – ыаллыы сытар илин эҥээрдээҕи улуустартан оту тиэйии кыһалҕатын суһаллык быһааралларыгар көрдөстүлэр.
Өймөкөөҥҥө уонна Томторго эмиэ тыа сирин дьонун тирээн турар кыһалҕалара биир: сайыҥҥы суол сабыллыан иннинэ оту уонна эбии аһылыгы тиэйтэриини быһаарыы. Эбиитин сири тупсаран оҥорууну, мелиорация үлэтин күүһүрдэн, ходуһа сир иэнэ кэҥэтиллэрин ситиһэргэ туруорустулар. Миниистир Артем Александров бэйэтин өттүттэн Өймөкөөн улууһугар тыа хаһаайыстыбата туруктаахтык, утумнаахтык сайдарын инниттэн эдэр ыччаттары көҕүлүүр, сыһыарар тоҕоостооҕун бэлиэтээтэ.
Өймөкөөн улууһа быйылгы кыстыкка 3 660 туонна оту бэлэмниир былааннааҕыттан айылҕа охсуутун кэнниттэн 1 488 туоннатын, 42 бырыһыанын, бэйэтин күүһүнэн хааччынары сабаҕалыыр. Тыа хаһаайыстыбатын уонна ас-үөл бэлиитикэтин министиэристибэтигэр 1 164 туонна оту илин эҥээрдээҕи уонна киин улуустартан атыылаһан тиэйтэрэргэ сайаапкалаан олорор. Мантан 600-чэ туонната сайыҥҥы суолунан тиксэрилиннэҕинэ эрэ Өймөкөөн бааһынай уонна кэтэх хаһаайыстыбалаах ыаллара сүөһүлэрин аһатан эрэр оттонуохтара. Атын суол суох.
Василий Никифоров
Оймяконский районпаводок