Аана суох дьиэ

Уолукпунан тыынар уолан саастарбар, тоҕус уонус сылларга, суоппардыырым. Биир бөһүөлэктэн нөҥүө бөһүөлэккэ фургонунан ас таһар эбээһинэстээҕим. Дьэ, биирдэ Мэҥэ Хаҥалас диэки ыыттылар, унаардаах уһун күнү быһа айанныыбын да, туһааннаах сирбэр тоҕо эрэ тиийэн быстыбакка эрэйдэммитим да, олус сылайбытым, илистибитим да. Мэҥэ Хаҥаласка диэри, дьиҥэ, аҕыс-тоҕус чааһынан тиийиэхтээҕим диэн өйдүүрүм. Уруулбун төттөрү эрийэ тутан, кэлбит суолбунан хос айанныырга санаммытым, арааһа, aaha барбыппын дуу дии санаабытым.

Ити курдук күнү быһа уон түөрт чаастан ордук тохтоло суох айаннаан олус утуктаабытым. Массыынабар олорон, нухарыйыах курдук буолан иһэммин, өйдөөн көрбүтүм, ойуур саҕатыгар дьиэ турара, миигин үөрдээри уот кылайан көстөрө. Үөрүүбүттэн хонор сирбин булбут курдук сананан, дьиэҕэ тиийэн кэлбитим. Сөҕүөм иһин, киирэр ааны булбаккабын, дьиэни тула эргийэ сылдыбытым. Онуоха түннүккэ биир саастаах эмээхсин өҥөс гыммытыгар: «Оо, дорообо, дьэ, хонноруоххут буолаарай?» — диибин. Эмээхсин: «Бу түннүгүнэн киир, дьонум таспыттан хатаан барбыттар», — диэн хоруйдаата. Иһирдьэ киирбитим, эчи кыараҕаһын, соҕотох да киһиэхэ?!

Кырдьаҕаһым хап-сабар алаадьы, үүт биэрбитин, аччыктаабытым бэрт буолан, охсон кэбистим. Олус сылайаммын сууллан түстүм да, утуйан хаалбыппын. Сарсыарда уһуктубутум, утуйан турбут сирим хоруоп дуу, туох эрэ уһун дьааһык дуу, аттыгар былыр үйэҕэ хатан хаалбыт алаадьы тооромосторо сыталлара. Кутталбыттан таһырдьа ойон тахсаат, массыынабын собуоттаан инним хоту уруулбун тутан кэбиспитим.

Дьэ, итинник айаннаан, кэмниэ-кэнэҕэс Майаны булбутум. Туохха түбэспиппин кэпсээбиппэр ол эргин дьон олорбот, быраҕыллан иччитэхсийбит элбэх дьиэ баарын эппиттэрэ. Ол айаммын санаатахпына, билигин да этим caаha аһыллан ыларга дылы!

«Саха сирин дьулаан түбэлтэлэрэ» хомуурунньуктан

УлуусМедиа