Байаҕантай нэһилиэгэр «Биһиги дьиэ кэргэн өйдөбүнньүгэ» бырайыак салҕанар

Тандаҕа Улуу Кыайыы 80 сылынан «Биһиги дьиэ кэргэн өйдөбүнньүгэ» бырайыак тэрээһинэ бэҕэһээ, балаҕан ыйын 6 күнүгэр, салгыы ыытылынна. Бу туһунан «Мүрү саһарҕата» хаһыат суруйар. 

Бу күн Япония милитаристарын үлтүрүтүү сэриитин кыттыылаахтарын Прокопий, Гаврил Васильевич Заболоцкайдар, Иван Иванович Заболоцкай, Иван Иннокентьевич Заболоцкай бойобуой суолларын туһунан кинилэр сыдьааннара – оҕолоро, сиэннэрэ, аймах-билэ дьонноро билиһиннэрдилэр, эйэлээх олоххо айымньылаах үлэлэрин туһунан ирэ-хоро кэпсээтилэр, киэҥ ис хоһоонноох быыстапкалары туруордулар. Кинилэр биир дойдулаахтарыгар маннык дириҥ ис хоһоонноох бырайыак быйыл сылы быһа ыытылла турарыгар махтаннылар, көлүөнэлэр быстыспат ситимнэрэ өрүү салҕана туруоҕар эрэллэрин биллэрдилэр, Байаҕантай хорсун-хоодуот сэрииһит уолаттарын кэриэстэригэр Өйдөбүнньүк уотугар уонна Геройдарбыт Г.В. Егоров, В.Д. Лонгинов пааматынньыктарыгар сибэкки дьөрбөтүн уурдулар.

Бу күн тандалар биир дойдулаахтара Советскай Союз Геройа В.Д. Лонгинов төрөөбүтэ 106 сылын бэлиэтээн аастылар. Манна күндү ыалдьыт буолан Лонгиновтар аймах сиэн кыыстара Ольга Светлакова кытынна. Кини Герой Владимир Лонгинов бииргэ төрөөбүт эдьиийэ Ольга Дионисьевна сиэнэ буолар. Ольга Никифоровна Танда олохтоохторо Герой аатын үйэлэри уҥуордаан күн бүгүҥҥэ диэри үйэтитэ, ахта-саныы, сүгүрүйэ сылдьалларыгар аймахтарын ааттарыттан дириҥ махталларын, билиниини уонна убаастабылы тириэртэ. Танда эрэ түмэлигэр Лонгиновтарга сыһыаннаах 200-тэн тахса дьиҥнээх экспонат баарын тоһоҕолоон бэлиэтээтэ, онно эбии быйыл кинилэр дьиэ кэргэн өссө үс тэрили, малы түмэлгэ бэлэхтииллэрин иһитиннэрдэ.

Бүгүҥҥү ураты суолталаах тэрээһиннэр милитаристскай Японияны кыайыы, Аан дойду иккис сэриитэ түмүктэммитэ 80 сылларынан Геройдар памятниктарыгар гирлянда ууруутунан, болуоссакка «Өйдөбүнньүк чүмэчитин» уматыынан, кыргыһыы хонуутугар тыыннарын толук уурбут ньургун уолаттарбыт кэриэстэригэр иһийэн туруу мүнүүтэтинэн түмүктэннэ.

Иван Колодезников, нэһилиэккэ Кыайыы 80 сылынан үбүлүөйдээх тэрээһиннэри тэрийэр хамыыһыйатын эппиэттиир сэкирэтээрэ

УлуусМедиа