Волонтердар Амма байыастарын уонна кинилэр дьиэ кэргэттэрин босхо эмтээтилэр

Амма улууһуттан байыаннай дьайыыга сылдьар эр дьоҥҥо уонна кинилэр дьиэ кэргэттэригэр ааспыт өрөбүллэргэ Арассыыйа норуодунай эмчиттэрин Сойууһун Саха сиринээҕи салаатын эмчиттэрэ көмөлөрүн оҥордулар. Бу туһунан «Амма олоҕо» хаһыат суруйар. 

— Массажтанаммыт наһаа да абыранныбыт. Тырааныспардаахпыт буоллар сарсын эмиэ кэлиэ эбиппит. Олох эппит-сииммит босхо ыытан кэбистэ, санныбыттан ыарахан ыйааһын түспүтүн курдук буолла, — диэн Абаҕа нэһилиэгиттэн кэлбит түөрт ийэ сылаас чэй иһэ-иһэ эмчиттэр тустарынан санааларын үллэстэллэр.

“МЕГА” эти — сиини чэбдигирдэр, өйү санааны сааһылыыр кабинет волонтердара – алгысчыт, норуот медицинатын туйгунаВероника Николаевна Семенова – Хомусчаана, эмчит Туйаара Николаевна Петрова, арчыһыт, эмчит Сардаана Николаевна Гаврильева – Ил Эйэ, эмчит, норуот медицинатын туйгуна Андрей Васильевич Константинов, массажист, эмчит Илья Васильевич Оконешников хосторуттан тахсыбыт дьон бука бары маннык кэпсээннээхтэр. Бэл биир орто саастаах дьахтар, оҕо эрдэҕиттэн сиһин тоноҕоһугар эчэйиилээх буолан токуруйан хаалбытын биир сеанс иһигэр көннөрбүттэрин сөҕө-махтайа ботур-ботур кэпсэтэллэр.

Амарах санаалаах волонтердар бу курдук Аммаҕа түөрт күн устата анал байыаннай дьайыыга сылдьар дьонноох ийэлэри, аҕалары, кэргэттэри, эбэлэри, байыастары кытта үлэлээтилэр. Кэлбит дьоҥҥо көмө оҥордулар, кэпсэттилэр, алгыстаатылар, арчылаатылар, илбийдилэр, хааннаатылар. Барыта 83 киһи кэлэн сүүстэн тахса сеанс ыллылар. Маннык үтүө, олус туһалаах түгэни кинилэргэ “Амарах сүрэх” КСВО салайааччыта Римма Алексеева сүүрэн-көтөн, кэпсэтэн бэлэхтээтэ.

— Байыаннай дьайыы кыттыылаахтарын дьиэ кэргэттэригэр бары хайысханан көмөнү, өйөбүлү оҥоро сатыыбыт. Бу сырыы табылларыгар элбэх киһи кылаатын киллэрдэ. Амма улууһун дьаһалтата, чуолаан баһылыгы бастакы солбуйааччы Василий Бураев, баһылыгы социальнай боппуруостарга солбуйааччы Ньургуйаана Илларионова, Амма нэһилиэгин баһылыга Михаил Артемьев, “Бөтүҥ түмсүү” салайааччыта Тамара Егорова, “Амарах сүрэх” волонтерскай ыстаап активист Далбар хотуттара – бука бары биир санаанан үлэлээммит дьоммут үлэлэлэрэ олус табылынна, элбэх киһи астынан, махтанан бардылар. Ол курдук, Чакыр, Амма, Чапчылҕан, Бөтүҥ, Абаҕа, Сулҕаччы, Амма Наахара нэһилиэктэриттэн дьон истиһэн кэлэн алгыстанан, эмтэнэн бардылар, Маны тэҥэ дьоммут көрдөһүүбүтүн быһа гыммакка икки күн Покровкаҕа тахсан үлэлээбиттэригэр махталбыт муҥура суох, — диэн Римма Васильевна күүстээх үлэттэн төһө даҕаны сылайдар, дуоһуйан олорон кэпсиир.

Римма Васильевна сырдатарынан, сотору кэминэн «Мега» кабинет филиала Амма улууһугар эмиэ аһыллан үлэлиэ. Оччотугар баҕалаах дьон хаһан баҕарар кэлэн психологическай көмөнөн туһаныахтарын, массажтаныахтарын сөп буолуо.

«Амма олоҕо» хаһыат.

УлуусМедиа