«Чолбон» сурунаал оонньуутун кыайыылаахтара Өлүөнэ очуостарыгар сынньаннылар
«Чолбон» сурунаал эрэдээксийэтэ ааҕар дьиэ кэргэттэргэ аналлаах «Чолбон өй күрэһэ. II улахан оонньуу» өрөспүүбүлүкэтээҕи бырайыагын 2024 сылга кыайыылаахтара Таатта улууһун Чөркөөҕүттэн Вырдылиннар дьиэ кэргэн сүүйбүт путевкаларынан балаҕан ыйын 10-12 күнүгэр «Михаил Светлов» теплоходунан Өлүөнэ очуостарыгар астына сынньанан кэллилэр. Ол туһунан санааларын үллэстэн суруйдулар:
«Ытыктабыллаах эрэдээксийэ! Олохпутугар биир умнуллубат кэрэ түгэннэри бэлэхтээбиккитигэр барыбыт аатыттан сахалыы, ис сүрэхтэн махтанабыт! Өлүөнэ эбэбит устун устан, айылҕа дьикти көстүүлэрин көрөн, астына-дуоһуйа сынньанан кэллибит. Дьиэ кэргэни, аймаҕы үрдүккэ-кэрэҕэ сомоҕолуур күрэскит үйэлээх буоллун! Оҕолорбут уу сахалыы төрөөбүт тылларынан айымньылары ааҕа турдуннар, ааҕыы күүстээх абылаҥар ылларан билиилээх-көрүүлээх дьон буола улааттыннар. Үлэҕитигэр үрдүк ситиһиини, ааҕааччы махталын куруук ыла туруҥ, саҥа айымньыларынан барыбытын сөхтөрө туруҥ».
Санатар буоллахха, «Чолбон өй күрэһэ. II улахан оонньуу» былырыын сэттэ улууһу уонна Дьокуускай куораты хабан ыытыллыбыта. Барыта 67 ыал кыттан саха литературатын билиилэрин тургутуспуттара. Кылаан тургутук диэн сүрэхтэммит үһүс түһүмэх «Саха» национальнай-көрдөрөр иһитиннэрэр хампаанньа аһаҕас эфиригэр ыытыллыбыта. Бу оонньууга Нам Түбэтиттэн Поповтар, Уус Алдан Бээдититтэн Шергиннэр, Чурапчы Мугудайыттан Поповтар, Мэҥэ Хаҥалас Чыамайыкытыттан Архиповтар, Горнай Бэс Күөлүттэн Ефремовтар, Дьокуускайтан Кармановтар уонна Таатта Чөркөөҕүттэн Вырдылиннар күөн көрсөн, эрбии биитин курдук эрийсиилээхтик күрэхтэспиттэрэ. Тыҥааһыннаах киирсии түмүгэр Вырдылиннар дьиэ кэргэн кыайан өрөгөй үөрүүтүн билбиттэрэ.
Кыайыылаах хамаанданы кытта билиһиннэрдэххэ:
Аграфена Николаевна Турнина (Вырдылина) – «Сардаана» төгүрүк сыл оҕолорго үлэлиир лааҕыр үлэһитэ. Иллэҥ кэмигэр сахалыы, нууччалыы прозаны ааҕар уонна иистэнэр дьарыктаах.
Александра Васильевна Вырдылина – Октябрьскай нэһилиэк баһылыгын солбуйааччы, СӨ ыччат политикатын уонна гражданскай көҕүлээһинин туйгуннара. Сахалыы кинигэни ааҕарын уонна баайарын сөбүлүүр.
Инара Харитонова – П.А. Ойуунускай аатынан Чөркөөх орто оскуолатын 8-с кылааһын үөрэнээччитэ. Үчүгэй үөрэнээччи, алын кылаастан наукалыы-практика конференцияларга ситиһиилээхтик кыттар. Саха классик суруйааччыларын айымньыларын сөбүлээн аахпытын, билигин Аҕа дойду Улуу сэриитин туһунан айымньыларынан үлүһүйэ сылдьарын кэпсээбитэ.
«Чолбон» сурунаал «Чолбон өй күрэһэ» бырайыагын партнердарынан СӨ Национальнай библиотеката уонна «Саха» НКИХ буолаллар. Сүрүн бирииһи – Өлүөнэ очуостарыгар сынньанар путевканы сурунаалы таһаарар «Сахабэчээт» СӨ САТ туруорар. Былырыыҥҥы улахан оонньууга ааҕар дьиэ кэргэттэри түмпүт Нам, Уус Алдан, Таатта, Горнай, Мэҥэ Хаҥалас, Чурапчы, Амма улуустарын уонна Дьокуускай куорат киин библиотекаларыгар барҕа махталбытын тиэрдэбит.
«Чолбон» сурунаал
Чолбон