Хатаска тырахтарыыстар күөн көрүстүлэр
Хатас нэһилиэгэр үгэскэ киирбит “Сатабыл” диэн тырахтарыыстар күрэхтэрэ буолан ааста. Күрэххэ 25 саастарыттан 60 саастарыгар диэри уопсайа 7 киһи кыттыыны ылла. Бу туһунан Саха сирин тытатын хаһаайыстыбатын министиэристибэтин пресс-сулууспата биллэрэр.
Быйылгы күрэх тумус туттар, бастыҥ салайааччы, мындыр Далбар, Дьокуускай куорат, Хатас нэһилиэгин уонна Мэҥэ Хаҥалас улууһун Бочуоттаах олохтооҕо, Арассыыйа тыатын хаһаайыстыбатын, СӨ норуотун хаһаайыстыбатын үтүөлээх үлэһитэ Парасковья Павловна Федорова төрөөбүтэ 98 сылыгар уонна Хатас нэһилиэгэ төрүттэммитэ 380 сылыгар ананан ыытылынна.
Быйылгы күрэх уратыта диэн кыттааччылар ортолоругар дьахтар — тырахтарыыс — 4 оҕо иһирэх ийэтэ, эйэҕэс эбээ Людмила Егоровна Жиркова кыттан дьон биһирэбилин ылыан ылла.
Күрэх бастакы түһүмэҕэр — тыраахтарынан эрийэ-буруйа суолу (змейка) барыыга Денис Мордовской тэҥнээҕин булбата.
Иккис миэстэҕэ былырыыҥҥы кыайыылаах, саамай эдэр кыттааччы Тихон Нохсоороп таҕыста.
Үһүс миэстэни күрэх аксакала Федот Николаев ылла.
Иккис түһүмэх — гаражка киирии. Бу күрэххэ бастакы түһүмэх үс бастыҥнара кими даҕаны иннилэригэр түһэрбэтилэр.
Үһүс түһүмэх – викторина. Манна лидердэртэн Тихон Нохсоороп ылбыт тэтимин ыһыктыбакка 1 миэстэ буолан, балаһыанньатын лаппа тупсарда. Иккис миэстэҕэ Владимир Соболев уонна үһүскэ Анатолий Баишев таҕыстылар.
Күрэх түмүктүүр быһаарыылаах түһүмэҕэр кыттааччылар маастарыстыбаларын, дьиҥ сатабылларын, уопуттарын көрдөрдүлэр.
Тыҥааһыннаах киирсии түмүгүнэн 3 миэстэҕэ саамай саастаах кыттааччы, Николаевтар механизатордар династияларын аатын үрдүктүк тута сылдьар Федот Николаев таҕыста уонна “Баҕарах ” ХЭХ анал бирииһин тутта.
Иккис миэстэни “Баҕарах ” ХЭХ үлэһитэ Денис Мордовской ситистэ уонна Парасковья Федорова төрөппүт уолун, СӨ тыатын хаһаайыстыбатын, СӨ айылҕа харыстабылын туйгунун, Үлэ бэтэрээнин, Хатас нэһилиэгин уопсастыбаннай олоҕун көхтөөх кыттааччытын, Хатас бэтэрээннэрин түмсүүтүн чилиэнин Иванов Герман Ксенофонтович дьиэ-кэргэнин аатыттан 50 000 солкуобайы анал бириис быһыытынан тутта.
Дьэ уонна муҥутуур кыайыылаах аатын 25 саастаах, күрэх саамай эдэр кыттааччыта, ааспыт сыл күрэҕин кыайыылааҕа Тихон Нохсоров ылыан ылла. Кыайыылаахха Ил Түмэн дьокутааттара В.А. Егоров уонна В.И. Федоров анал бириистэрин – Үөһээ Дьааҥы сылгытын туттардылар.
«Күрэххэ күүс-көмө буолбут бар дьоммутугар, Хатас нэһилиэгин дьаһалтатыгар, култуура киинин үлэһиттэригэр, бириис олохтообут спонсордарга уонна кыттааччыларга, ону кытта көрөөччүлэргэ дириҥ махталбытын тириэрдэбит» — диэн Хатастааҕы «Тускул» КК үлэһитэ Наталья Руфова эттэ.
Сельское хозяйство