Сырдык ааттара умнуллубат: Найахыга ахтыы күнэ буолла
Балаҕан ыйын 20 күнүгэр Найахы нэһилиэгэр «Ааккыт уһун үйэлэргэ» өйдөбүнньүк, ахтыы күнэ буолла.
Оскуола биир чаҕылхай выпускнига, анал байыаннай дьайыы бэтэрээнэ, гвардия ефрейтора, снайпер, гранатомётчик, «За доблесть и отвагу при выполнении военного долга» Эр хоһуун уордьаннаах, байыаннай сорудахха сылдьан, 2024 сыл. охтубут Белолюбскай Күндүл Иванович кэриэһигэр «Чаҕылхай, күлүмнүүр тыыннааххын» кинигэ сүрэхтэннэ. Бу туһунан «Мүрү саһарҕата» хаһыат суруйар.
Эссе-ахтыы кинигэни оҕотун сүтэрбит ийэ Күннэй Белолюбская 26 эрэ сыл олорбут уолун олоҕун сырдаппытын олус долгутуулаахтык билиһиннэрдэ.
Иитээччилэрэ, учууталлара, доҕотторо, эдьиийдэрэ Күндүл үөрэххэ, үлэҕэ инники күөҥҥэ сылдьыбытын, көҕүлүүр, түмэр, дэгиттэр дьоҕурдааҕын, эрэллээх доҕор, истиҥ сыһыаннаах убай, быраат буоларын иһирэхтик аҕыннылар.
Олоххо саҥа үктэммит эдэркээн ыччат кылгас эрээри чаҕылхай олоҕун кэпсиир ахтыылары, хаартыскалары, ааптар эссетин уонна маҥнайгы таптал кыымыгар таарыйтаран, үөрүүтүн-хомолтотун, инникигэ дьулуурун, хайдах эрэ этиттэрии курдук «Орто дойдуну хаалларан бардахпына…» — диэн Күндүл хоһооннорун тэтэрээккэ бооччойон хаалларбытын ийэтэ барахсан булан ааҕан, этин сааһа аһыллыбытын туһунан биэс түһүмэхтээх кинигэҕэ ааҕыаххыт…
Күннэй Спиридоновна нэһилиэк баһылыга Петр Слепцовка, биир дойдулаахтарыгар өйөбүл, көмө иһин махтанан, сүрэҕин сылааһынан иитиэхтээн таһаарбыт кинигэлэрин бэлэх уунна. Кинигэ сүрэхтэниитин эдьиийдэрэ Люция Спиридоновна Тойтонова ииллээн-саҕалаан ыытта.
«Кэриэстэбил» тэрээһин иккис түһүмэҕэр анал байыаннай дьайыы толоонугар охтубут байыастар: танковай батальон отделениетын командира, младшай сержант, «За мужество и отвагу» уордьаннаах Николай Голиков, «Хорсунун иһин» 2 ст. мэтээллээх снайпер, Беркут — Александр Ушницкай, гвардия ефрейтора, снайпер, гранатомётчик «За доблесть и отвагу» уордьаннаах Күндүл Белолюбскай сырдык ааттарын үйэтитэн, олорбут, сүүрбүт-көппүт уулуссаларыгар ааттара иҥэриллиннэ. Хоһуун-хоодуот уолаттарбыт эрчиллибит «Тиит Буурай» спортивнай саалаларын таһыгар баннердар ыйаннылар. Күндү оҕолорбут ааттара үйэлэргэ умнуллубат.
Светлана Петрова, ветеран учуутал, Балыктаах
СВО