Туймаада хочотугар сарсыҥҥыттан “Ас-үөл – 2025” атыы-тутуу түһүлгэтэ тэлгэниэ

Күһүҥҥү киһи – күлбүтүнэн. Үгэскэ кубулуйбут өрөспүүбүлүкэтээҕи ас-үөл быыстапка-дьаарбаҥката сарсыҥҥыттан, балаҕан ыйын 24 күнүттэн, саҕаланыа уонна өрөбүлгэ биирдэ түмүктэниэ. Онон киин куорат олохтоохторо уонна ыалдьыттара биэс күнтэн бииригэр хайаан даҕаны сылдьан, аһы-үөлү оҥорон таһаарааччы бэйэтэ быһар сыанатыгар быһаччы атыылаһалларыгар тоҕоостоох түгэн үөскээн эрэр.

Өрүү буоларын курдук, бу киэҥ хабааннаах тэрээһин Дьокуускайга Хомсомуол болуоссатыгар ыытыллыа. Ити ыйыллыбыт күннэргэ атыы-тутуу сарсыарда 10 чаастан киэһэ 7 чааска диэри оргуйан олоруо. Тыа хаһаайыстыбатын уонна ас-үөл министиэристибэтигэр бүгүн сарсыардааҥҥа диэри киирбит сайаапкаларынан сирдэттэххэ, илин эҥээртэн Мэҥэ Хаҥалас, Амма, Уус Алдан, Чурапчы, Таатта, Бүлүү сүнньүттэн Сунтаар, Бүлүү, хотуттан Булуҥ, Усуйаана, Үөһээ Дьааҥы, арҕааттан Ленскэй, киинтэн Хаҥалас, Куорунай улуустарын уонна Дьокуускай куорат асчыттара кыттыахтара. Кинилэргэ анаан 51 эргиэн миэстэтэ тэриллибит.

Бастакы күн күнүс 2 чаастан быыстапка-дьаарбаҥканы үөрүүлээхтик арыйыыга бырабыыталыстыба бэрэссэдээтэлин солбуйааччы Сергей Местников, Ил Түмэн бэрэссэдээтэлэ Алексей Еремеев, парламент тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Александр Атласов, тыа хаһаайыстыбатын уонна ас-үөл бэлиитикэтин миниистирэ Артем Александров, Дьокуускай куорат дьаһалтатын баһылыга Евгений Григорьев, СӨ бааһынай хаһаайыстыбаларын уонна тыа хаһаайыстыбатын кэпэрэтииптэрин ассоциациятын бэрэсидьиэнэ Александр Артемьев дьаарбаҥка кыттыылаахтарын, ыалдьыттарын эҕэрдэлиэхтэрэ. Чулуу үлэһиттэргэ хас биирдиилэрэ бэйэлэрин биэдэмистибэлэрин наҕараадаларын туттарыахтара. Силигин ситэрэн, көмүс күөмэйдээхтэр кэнсиэртэрэ киэргэтиэ.

Быйылгы тэрээһиҥҥэ тыа хаһаайыстыбатын табаарын оҥорон таһаарар тэрилтэлэр салайааччыларыгар, исписэлиистэригэр чопчу сыһыаннаах мунньах элбэх. Ол курдук, балаҕан ыйын 24 күнүгэр сарсыарда 10 чаастан 12-гэ диэри бырабыыталыстыба 2-с дьиэтигэр ас-үөл хаачыстыбатын уонна куттала суох буолуутун хааччыйыыга Ил Дархан иһинэн сүрүннүүр сүбэ мунньаҕа, нөҥүө күн министиэристибэ мунньахтыыр саалатыгар Суотту нэһилиэгэр (Уус Алдан) олоҕуран, Өлүөнэ сүнньүнээҕи боруода сылгыга саҥа Алтай боруода хаанын киллэрии итиэннэ балаҕан ыйын 26 күнүгэр өрөспүүбүлүкэҕэ ынах үүтүн тутууга мониторинг тиһигин тупсарыы тустарынан стратегическай сиэссийэлэри ыытыы былааннаммыт.

“Ас-үөл – 2025” быыстапка-дьаарбаҥка кыайыылаахтарын, бастыҥнарын балаҕан ыйын 27-28 күннэригэр миниистир уонна кини солбуйааччылара солбуһа сылдьан наҕараадалыахтара. Онон кыттааччыларга биһирэбил өттө тииһимньилээх буолсу. Ити быыһыгар субуотаҕа, өрөспүүбүлүкэбит судаарыстыбаннаһын күнүгэр, күнүс 2 чаастан Агротехнология университетын ипподромугар Тыа хаһаайыстыбатын уонна ас-үөл бэлиитикэтин министиэристибэтин бирииһигэр ыытыллар түөрт түөрэм туйахтаахтар илин былдьаһыылара ат сүүрдүүтүн сэҥээрээччилэри күүтэр.

Василий Никифоров

СӨ ТХМ пресс-сулууспатын хаартыскаҕа түһэриитэ

УлуусМедиа